Tags-Duniya

kyuuñ tark-e-alā.iq ko tum ne samjhā hai ilāj-e-ġham āḳhir
dekho to valī suufī bhī yahāñ kis ThaaT ke duniyā-dār hue

ahl-e-adab ne phir ye kiyā tajraba nayā
shā.er mavāsalāt kī duniyā pe chhā gayā

jis taraf jaa.eñ jahāñ jaa.eñ bharī duniyā meñ
rāsta roke tirī yaad khaḌī hotī hai

khetoñ kī hariyālī ban kar chhab apnī dikhlā.eñge
duniyā kā dukh-sukh apnā kar duniyā par chhā jā.eñge

zarra zarra is duniyā kā aaj gagan kā taarā hai
ye dhartī ye jīvan-sāgar ye sansār hamārā hai

apnī hī āvāz kī lai par saarī duniyā gaatī hai
aaj tirañge kī lahroñ meñ bijlī sī lahrātī hai

jo rahtā hai azal kī justujū meñ
vo duniyā meñ kise gardāntā hai

marne kī duā.eñ kyuuñ māñgūñ jiine kī tamannā kaun kare
ye duniyā ho yā vo duniyā ab ḳhvāhish-e-duniyā kaun kare

shobade āñkhoñ ke ham ne aise kitne dekhe haiñ
aañkh khulī to duniyā thī band huī afsāna thā

chhupā ke le gayā duniyā se apne dil ke ghaao
ki ek shaḳhs bahut taaq is hunar meñ thā

ai chashm haqīqat meñ duniyā ko ye samjhā de
baaqī bhī vahī niklī jo chiiz ki faanī thī

ek kiran bas raushniyoñ meñ sharīk nahīñ hotī
dil ke bujhne se duniyā tārīk nahīñ hotī

go is kī ḳhudā.ī meñ mahājan kā bhī hai haath
duniyā to samajhtī hai farañgī ko ḳhudāvand

har ek shaḳhs kī apnī hī ek duniyā hai
kahāñ kisī ko kisī kā ḳhayāl hotā hai

kab se is duniyā ko sargarm-e-safar paatā huuñ maiñ
phir bhī har manzil ko pahlī rahguzar paatā huuñ maiñ

duniyā meñ kyā kisī se sarokār hai hameñ
tujh bin to apnī ziist hī dushvār hai hameñ

ik-ādh jaam to pī hī liyā thā ham ne bhī
ḳhumār-e-ḳhāna-e-duniyā kī sair karte hue

māl-o-zar kī qadr kyā ḳhūn-e-jigar ke sāmne
ahl-e-duniyā hech haiñ ahl-e-hunar ke sāmne

ye duniyā āsmāñ meñ uḌ rahī hai
ye lagtī hai magar be-par nahīñ hai

bharī duniyā meñ jī nahīñ lagtā
jaane kis chiiz kī kamī hai abhī