Tags-Duniya

chup-chāp apnī aag meñ jalte raho 'farāz'
duniyā to arz-e-hāl se be-ābrū kare

ek tabqa to ka.ī nasl se is duniyā se
ḳhvāb āñkhoñ meñ sajātā hai chalā jaatā hai

daur-e-mustaqbil pe duniyā ke nigāheñ thiiñ tirī
rahbar-e-rāh-e-amal dil-doz aaheñ thiiñ tirī

gulshan kī faqat phūloñ se nahīñ kāñToñ se bhī zīnat hotī hai
jiine ke liye is duniyā meñ ġham kī bhī zarūrat hotī hai

ik yahī duniyā badaltī hai 'faroġh'
kaisī kaisī ajnabī duniyāoñ meñ

hai ek vaqt muqarrar, vagarna duniyā meñ
koī zavāl pe tayār thoḌī hotā hai

ye mai-kada hai jaa.e ibādat hai riñd kī
duniyā kā har fareb yahāñ be asar rahā

duniyā ne ḳhuub samjhā duniyā ne ḳhuub parkhā
merī nazar ko dekhā jab aap kī nazar se

kisī duniyā ke naqshe meñ
koī achchhā bahut achchhā nagar hai

is qadar hai jo dam-e-naza.a havas duniyā kī
saath le jā.egā kyā ālam-e-fānī vaa.iz

ḳhayāl-o-ḳhvāb kī duniyā meñ lā ke dekh liyā
tirī qasam tujhe tujh se chhupā ke dekh liyā

ek taraf tire husn kī hairat ek taraf duniyā
aur duniyā meñ der talak Thahrā nahīñ jā saktā

ġham-e-daurāñ ġham-e-jānāñ ġham-e-uqbā ġham-e-duniyā
'kañval' is zindagī meñ ġham ke māroñ ko na chain aayā

na paimāne khanakte haiñ na daur-e-jām chaltā hai
na.ī duniyā ke rindoñ meñ ḳhudā kā naam chaltā hai

duniyā meñ koī shaad koī dard-nāk hai
yā ḳhush hai yā alam ke sabab sīna-chāk hai

bahut ro.egī duniyā us bashar kī bad-nasībī par
jo dāġh-e-ārzū le kar tirī mahfil se niklegā

duniyā ne dil ko aur dil ne duniyā ko
donoñ ne hī apne taur pe bartā hai

log duniyā kā ġham uThāte haiñ
ham ko chhoTī sī baat ne maarā

ḳhushk āñkhoñ se uThī mauj to duniyā Duubī
ham jise samjhe the sahrā vo samundar niklā

us ne hañgāmoñ se bahlā.ī hai apnī duniyā
vaqt se amn kī shahnā.ī bajā.ī na ga.ī