Tags-Duniya

jahān-e-dil to hai nazdīk 'vāsil' duur kyuuñ jaao
isī duniyā meñ rahtā hai tumhārā mehrbāñ shāyad

hue haiñ tañg is duniyā se aise
bilā-tāḳhīr marnā chāhte haiñ

kyuuñ uljhe ho 'mahshar' ye tavaqqo hī ġhalat hai
zaḳhm-e-ġham-e-duniyā kabhī duniyā ne bhare haiñ

duniyā se to laḌne kā aa.egā mazā kitnā
paane kī tamannā meñ miTne kā bhī imkāñ hai

pahle apnī hālat pe hañs le ḳhud hī jī bhar ke
dekh kar mujhe duniyā tanz se jo hañstī hai

tujh se matlab hai nahīñ duniyā o uqbā se ġharaz
tū nahīñ jab to ujaḌ jaa.eñ ye ghar donoñ saath

kyā kahūñ darpai-e-āzār hai duniyā 'shāhīn'
aadmī qaid-e-zamāna se nikaltā hī nahīñ

jis naqsh pe chalne kī qasam khātī hai duniyā
maiñ hī vo tirā naqsh-e-kaf-e-pā to nahīñ huuñ

duniyā sabab-e-shorish-e-ġham pūchh rahī hai
ik mohr-e-ḳhamoshī hai ki hoñToñ pe lagī hai

ḳhayāl-e-ujrat-e-mauhūm par 'iqbāl' duniyā meñ
ye ham se zindagī ke bojh kyuuñ uThvā.e jaate haiñ

tishnagī sab kī bujhā.eñ bahr-e-be-pāyāñ baneñ
ban ke duniyā meñ raheñ ham kyuuñ sarāboñ kī tarah

āñkhoñ ke tasādum meñ hikāyāt kī duniyā
hoñToñ ke tasādum meñ ḳharābāt kā aalam

kuchh ta.alluq rahā na duniyā se
shaġhl aisā batā diyā tū ne

harf ke harf se kyā tazādāt haiñ tū ne bhī kuchh kahā maiñ ne bhī kuchh kahā
tere pahlū meñ duniyā simaTtī ga.ī mere hisse meñ harf-e-suḳhan rah gayā

kis quvvat-e-be-dard kā iz.hār hai duniyā
har dil ko gilā hai ki dil-āzār hai duniyā

log is ko kahā karte haiñ achchhā bhī burā bhī
kyā ḳhuub ki donoñ kī sazā-vār hai duniyā

miltā hī nahīñ koī dil-e-zār kā pursāñ
mere liye ik mahfil-e-aġhyār hai duniyā

har sañg meñ duniyā ko nazar aatā hai ik but
aur aise har ik but kī parastār hai duniyā

ye hashr ye hañgāma nahīñ aaj pe mauqūf
sach ye hai ki sadiyoñ hī se bīmār hai duniyā

nekī koī kartā ho to karvaT nahīñ letī
niyyat ho gunāhoñ kī to bedār hai duniyā