Tags-Duniya

jis ne banā.ī duniyā
jis ne basā.ī duniyā

siikh duniyā hī meñ zāhid huur se milne ke Dhañg
varna ro.egā ki jannat meñ bhī rusvā.ī huī

banā ke vahm o gumāñ kī duniyā haqīqatoñ ke sarāb dekhūñ
maiñ apne hī ā.īne meñ ḳhud ko jahāñ bhī dekhūñ ḳharāb dekhūñ

ḳhayāl-o-fikr kā dam ghuT rahā hai
na.ī duniyā banānā chāhtā huuñ

aadat mirī duniyā se chhupāne kī nahīñ thī
vo baat bhī kah dī jo batāne kī nahīñ thī

sanjīda logoñ kā jiinā mushkil hai
khel tamāshe duniyā kā dastūr hue

mirī duniyā badal dī jumbish-e-abrū-e-jānāñ ne
ki apnā hī rahā apnā na ab begāna na begāna

kuchh rañj nahīñ kuchh fikr nahīñ duniyā se alag ho baiThe haiñ
dil chain se hai ārām se hai ālām nahīñ āfāt nahīñ

ishq-bāzoñ kī kahīñ duniyā meñ shunvā.ī nahīñ
in ġharīboñ kī qayāmat meñ samā.at ho to ho

ma.alūm hai duniyā ko ye 'hasrat' kī haqīqat
ḳhalvat meñ vo mai-ḳhvār hai jalvat meñ namāzī

ek duniyā ek saa.e par taras khātī huī
lauT kar aayā huuñ maiñ apnā tamāshā dekh kar

umr bhar kāñToñ meñ dāman kaun uljhātā phire
apne vīrāne meñ aa baiThā huuñ duniyā dekh kar

ho gayā ma.amūr aalam jab kiyā darbār-e-ām
taḳhliya chāhā to duniyā saaf ḳhālī ho ga.ī

hai bahār-e-gulshan-e-duniyā do roz
bulbul-o-gul ke nazāre ho chuke

muñh lagāyā hī nahīñ aslaha-sāzoñ ko kabhī
maiñ ne duniyā ko harāyā bhī to dildārī se

daas lagte haiñ ye duniyā ke suḳhnavar tere
terī bātoñ kā vo andāz-e-bayāñ hai jānāñ

kah ke patthar jise duniyā ne lagā dī Thokar
vo mirā dil hai mohabbat kā makāñ hai jānāñ

harīf ho ga.e qurbāñ matā.a-e-duniyā par
unheñ bhī jaañ se koī shai azīz-tar to huī

batā.ūñ kyā tujhe ai ham-nashīñ kis se mohabbat hai
maiñ jis duniyā meñ rahtā huuñ vo is duniyā kī aurat hai

tamīz-e-dair-o-ka.aba hai na fikr-e-dīn-o-duniyā hai
ye rind-e-pāk-tīnat bhī tire allāh vaale haiñ