Tags-Duniya

āzāda-manish rah duniyā meñ parvā-e-ummīd-o-bīm na kar
jab tak na mileñ fitrat ke qadam ḳham dekh sar-e-taslīm na kar

kab ek rañg meñ duniyā kā haal Thahrā hai
ḳhushī rukī hai na koī malāl Thahrā hai

ash.ār mere kyā haiñ faqat kuchh ta.assurāt
duniyā agar kitāb hai to hāshiya huuñ maiñ

ziyāñ kī zad pe duniyā meñ ka.ī log aur bhī hoñge
to phir ai nā-murādī tū mire ġham kā sahārā ho

aaj duniyā ko nahīñ apne ġhamoñ se fursat
aaj mil baiThnā āsāñ hai qarīb aa jaao

har ek jalva-e-rañgīñ mirī nigāh meñ hai
ġham-e-firāq kī duniyā dil-e-tabāh meñ hai

duniyā sab kuchh paḌhtī hai
duniyā ko kyā samjhe ho

terī nigāh-e-nāz ne aisā fusūñ paḌhā
dīvāne ho ke duniyā se ashfāq chal paḌe

bāteñ karne meñ to duniyā meñ sabhī hoshyār the
saath dete mushkiloñ meñ vo to bas do-chār the

tū salāmat rahe tire dam se
dil kī duniyā javān hai pyāre

jise bhī dekho lubhāyā huā hai duniyā kā
so bach ga.e haiñ miyāñ kaise is rakhel se ham

jo kuchh ki hai duniyā meñ vo insāñ ke liye hai
ārāsta ye ghar isī mehmāñ ke liye hai

ban kar jo ik haqīqat duniyā pe chhā ga.e the
duniyā meñ aaj un ke afsāne rah ga.e haiñ

ham un ke taġhāful ko samajhte to haiñ lekin
duniyā bhī samajh le ye gavārā nahīñ karte

aam raste se haT ke aayā huuñ
saarī duniyā se kaT ke aayā huuñ

duniyā vaale mujh ko pāgal kahte haiñ
maiñ sūraj se aañkh milātā rahtā huuñ

ḳhayāl o sher kī duniyā meñ jaan thī jin se
fazā-e-fikr-o-amal arġhavān thī jin se

ye duniyā imtihāñ-gāh-e-mohabbat
ye duniyā hāsil-e-karb-o-balā hai

sambhalnā aur bhī dushvār hogā
mujhe kahtī hai duniyā barguzīda

maiñ gahre pāniyoñ meñ Dūbtā 'anjum' jazīra huuñ
mirī duniyā parindoñ kī hasīñ chahkār ho jaise