Tags-Duniya

hañste ho mil ke duniyā se kyā mere haal par
maiñ aap kā dīvāna huuñ dīvāna to nahīñ

na bastiyoñ ko aziiz rakkheñ na ham bayābāñ se lau lagā.eñ
mile jo āvārgī kī fursat to saarī duniyā meñ ḳhaak uḌā.eñ

jab bhī fursat milī hañgāma-e-duniyā se mujhe
merī tanhā.ī ko bas terā pata yaad aayā

tire ahkām kī duniyā mire a.amāl kā mahshar
yahāñ merī vahāñ terī ḳhushī se kuchh nahīñ hotā

tamām umr sañvārā ġhazal kī duniyā ko
ki 'ashk' ham ne kuchh is ke sivā kiyā hī nahīñ

chhup ke duniyā se savād-e-dil-e-ḳhāmosh meñ aa
aa yahāñ tū mirī tarsī huī āġhosh meñ aa

aur duniyā meñ kahīñ terā Thikāna hī nahīñ
ai mire dil kī tamannā lab-e-ḳhāmosh meñ aa

ain mumkin hai ye duniyā kā ho markaz mirī zaat
mujh tak aa.e jo samāvāt se rasta nikle

apnī duniyā ḳhud ba-faiz-e-ġham banā saktā huuñ maiñ
ik jahān-e-shauq-e-nā-mohkam banā saktā huuñ maiñ

hañse bhī ro.e bhī lekin na samjhe
ḳhushī kyā chiiz hai duniyā meñ ġham kyā

nahīñ jab quvvat-e-ehsās dil meñ
ġham-e-duniyā surūr-e-jām-e-jam kyā

bhulā degī hameñ do din meñ duniyā
hamārī shā.irī kyā aur ham kyā

duniyā-dārī to kyā aatī dāman siinā siikh liyā
marne ke the laakh bahāne phir bhī jiinā siikh liyā

o parda-dār ab to nikal aa ki hashr hai
duniyā khaḌī huī hai tire intizār meñ

na duniyā bā.is-e-ġhaflat na uqbā vaj.h-e-hushyārī
rahe jo tujh se ġhāfil ham use ġhāfil samajhte haiñ

nañg ho kyuuñ kar na mere vāste duniyā mirī
zindagī merī mujhe ḳhud aar hai tere baġhair

uf do-rañgī-e-duniyā uf tazād kā aalam
kufr ke ujāle haiñ tīrgī-e-īmāñ hai

ye tirā kaam nahīñ dekh na duniyā kī taraf gaa.e jā
maddham ik aah meñ ik chīḳh meñ pancham na badal jaa.e kahīñ

sochtā huuñ ki mohabbat hai javānī kī ḳhizāñ
us ne dekhā nahīñ duniyā meñ bahāroñ ke sivā

uThe jaate haiñ dīda-var sabhī āhista āhista
ye duniyā mo'tabar logoñ se ḳhālī hotī jaatī hai