Tags-Duniya

insāñ vo uThā jis kā saanī sadiyoñ meñ bhī duniyā jan na sakī
mūrat vo miTī naqqāsh se bhī joban ke dobāra ban na sakī

jis saañs meñ duniyā jaañ paa.e us saañs kī nik.hat kyā kahiye
jis maut pe hastī naaz kare us maut kī azmat kyā kahiye

apnoñ ke liye jām-o-sahbā auroñ ke liye shamshīr-o-tabar
nard-e-insāñ Taptī hī rahī duniyā kī bisāt-e-tāqat par

hinsā ko ahinsā kā apnī paiġhām sunāne aayā thā
nafrat kī maarī duniyā meñ ik prem sandesa laayā thā

tū chup hai lekin sadiyoñ tak gūñjegī sadā-e-sāz tirī
duniyā ko añdherī rātoñ meñ Dhāras degī āvāz tirī

rone vaale hue chup hijr kī duniyā badlī
sham.a be-nūr huī sub.h kā taarā niklā

chand aañsū haiñ ki hastī kī chamak hai jin se
kuchh havādis haiñ ki duniyā ko javāñ rakhte haiñ

duniyā meñ jāntā huuñ ki jannat mujhe milī
rāhat agar zarā sī musībat meñ mil ga.ī

sar-e-sahrā-e-duniyā phuul yuuñ hī to nahīñ khilte
diloñ ko jītnā paḌtā hai tohfe meñ nahīñ malte

kuchh nahīñ likkhā huā phir bhī paḌhā jaatā hai kyā
aisī nā-maujūd ko duniyā kahā jaatā hai kyā

ḳhuub rindoñ ne uḌaa.e haiñ maze duniyā ke
hiiz ko bakr hai mardoñ kī vo madḳhūlā hai

phirtī hai to phir jaa.e badaltī hai to badle
duniyā kī nazar hai mirī qismat to nahīñ hai

mere haal se duniyā kā andāza kar lo
maiñ phaldār shajar kā ik piilā pattā huuñ

jaane kis pal kī ḳhushbū hai mere aage
jaane kis duniyā ke pīchhe dauḌ rahā huuñ

saḳht tārīk hai dil kī duniyā
aise aalam meñ agar tū chamke

badnām kiyā laakh tujhe ḳhud-ġharazoñ ne
phir bhī tirī duniyā ko zarūrat hai mohabbat

duniyā kahe kuchh hai magar īmān kī ye baat
hone kī tarah ho to ibādat hai mohabbat

merī nazroñ meñ duniyā bhī uqbā bhī hai
aadmī huuñ maiñ 'at.har' farishta nahīñ

ab jidhar dekhiye lagtā hai ki is duniyā meñ
kahīñ kuchh chiiz ziyāda hai kahīñ kuchh kam hai

kitnī vīrān nazar aatī hai tā-hadd-e-nazar
yahī duniyā ki jo vīrān nahīñ dekhne meñ