Tags-Duniya

ye duniyā hai yahāñ aslī kahānī pusht par rakhnā
laboñ par pyaas rakhnā aur paanī pusht par rakhnā

ham ki ik umr rahe ishva-e-duniyā ke asiir
muddatoñ ba.ad ye kam-zāt samajh meñ aa.ī

duniyā se duniyā meñ rah kar kaise kināra kar rakkhā hai
dekh to aa kar kis sūrat se ham ne guzāra kar rakkhā hai

pahle to ham duniyā samjhe lekin ab ehsās huā hai
josh-e-junūñ meñ ham ne ḳhud ko paara paara kar rakkhā hai

tumhārā naam duniyā jāntī hai
bahut rusvā haiñ ab ash.ār mere

merī duniyā meñ mohabbat nahīñ kahte haiñ ise
yuuñ to har sañg ke siine meñ sharar miltā hai

dil koī phuul nahīñ aur sitāra bhī nahīñ
kār-e-duniyā kā nahīñ aur tumhārā bhī nahīñ

safar duniyā se karnā kyā hai 'tābāñ'
adam hastī se rāh-e-yak-nafas hai

goyā duniyā kī zarūrat nahīñ durveshoñ ko
ya.anī kashkol ulaTne ke liye hotā hai

'hātim' huā huuñ āl-e-nabī kī panāh meñ
duniyā o diiñ ke ġham se nahīñ kuchh ḳhatar mujhe

ahl-e-duniyā to hamesha hī se aise the magar
ishq itnā nā-tavāñ pahle kabhī dekhā na thā

khul ga.iiñ āñkheñ ki jab duniyā kā sach ham par khulā
apne andar sab khule haiñ kaun hai bāhar khulā

ba-juz mauj-e-fanā duniyā meñ 'mohsin'
hamārī justujū kis ko rahī thī

hai ye duniyā jā-e-ibrat ḳhaak se insān kī
ban ga.e kitne subū kitne hī paimāne hue

saarī duniyā Dhal rahī hai maġhribī tahzīb meñ
be-hayā.ī ab mirī poshāk ho jā.egī kyā

koī vajūd hai duniyā meñ koī parchhā.īñ
so har koī nahīñ hotā kisī kī parchhā.īñ

kuchh din meñ dil kā kho jaanā bilkul mumkin hai
kahtā hai ham baḌe hue ab duniyā dekheñge

do-chār tinkoñ kī duniyā ajiib duniyā thī
ki mutma.in thā har ik tarah jis meñ dil merā

ḳhudā kī yaad meñ duniyā ko bhuul jā ai dil
vo kaam kar ki har ik tarf sūd-mand rahe

us bastī ke logoñ se jab bāteñ kiiñ to ye jaanā
duniyā bhar ko joḌne vaale andar andar bikhre haiñ