Tags-Duniya

ġham-e-dil kā ilaaj duniyā meñ
shāyad is ke sivā kuchh aur na ho

ḳhush ho duniyā ki ham tirī ḳhātir
bazm-e-yārāñ meñ be-hunar Thahre

bagūle aisī havā aur ek rañgā huā ghoḌā
lahū-luhān dil hamesha ghaḌ letā hai ek duniyā apne liye

duniyā meñ ghuum phir ke bhī aise lagā mujhe
jaise maiñ apnī zaat se bāhar nahīñ gayā

ḳhvāhish havas ke ruup meñ achchhī nahīñ lagī
duniyā ko fat.h kar ke sikandar nahīñ gayā

lagtā hai ki pinjre meñ huuñ duniyā meñ nahīñ huuñ
do roz se dekhā koī aḳhbār nahīñ to

duniyā hameñ nābūd hī kar Dālegī ik din
ham hoñge agar ab bhī ḳhabar-dār nahīñ to

ġham se martā huuñ ki itnā nahīñ duniyā meñ koī
ki kare tāzīyat-e-mehr-o-vafā mere ba.ad

log achchhe zindagī pyārī hai duniyā ḳhūbsūrat
aah kaisī ḳhush-kalāmī kar rahī hai rūh-e-shab bhī

har galī aa.ī nazar kūcha-e-jānāñ kī tarah
ham ko duniyā ye lagī shahr-e-nigārāñ kī tarah

mohabbat ke evaz meñ o mohabbat DhūñDne vaale
ye duniyā hai yahāñ aisā are nādāñ nahīñ hotā

yuuñ to duniyā meñ har ik kaam ke ustād haiñ shaiḳh
par jo kuchh aap meñ fan haiñ vo kise yaad haiñ shaiḳh

terī duniyā bhī mirī tarah ujaḌ jā.egī
rah gayā mujh meñ agar sabr kā mādda aadhā

duniyā meñ koī mujh sā gunahgār na hogā
maiñ ḳhaak kā putlā nahīñ putlā huuñ ḳhatā kā

sabr kī shāḳh meñ lagtā hai vo mīThā meva
sab se duniyā meñ alag jis kā mazā hotā hai

duniyā kā jo bas chaltā rakh detī kuchal kar hī
phir ye bhī haqīqat hai ham kitnā pare hote

jo hīroñ ke ruup meñ dar dar apne aañsū baañT rahe haiñ
un fan-kāroñ par pheñkeñge kab tak duniyā vaale patthar

ek muddat se baaġh duniyā kā
apne dil meñ lagā rahā huuñ maiñ

vo roz-e-hashr hai duniyā nahīñ ki raah mile
kahāñ chhupoge jo do chaar dād-ḳhvāh mile

ye duniyā milkiyat apnī na virsa hai buzurgoñ kā
yahāñ jo aadmī hai vo kirā.e-dār jaisā hai