Tags-Duniya

bahut se aise bhī duniyā meñ log milte haiñ
jo bā-ḳhabar haiñ magar haiñ vo be-ḳhabar kī tarah

vaqt-e-duniyā ko samajhne meñ kareñ zaayā kyā
haif ab tak to na ham hī samajh aa.e ḳhud ko

us ke baad vahī tasvīreñ sab ko dikhātā huuñ
ḳhvāboñ kī vo duniyā saarī dil meñ qaid huī

ek duniyā ko chāhtā thā vo
ek duniyā meñ us pe vaar aayā

dekhtā huuñ maiñ bhī sab ke saath duniyā ko magar
ik alag zauq-e-nazar ik zāviya merā bhī hai

kabhī kabhī hameñ duniyā hasīn lagtī thī
kabhī kabhī tirī āñkhoñ meñ pyaar dekhte the

ham bhī apne ko badal Dāleñge rafta rafta
abhī duniyā hameñ jannat se baḌī lagtī hai

tujh meñ kab husn-e-bahār-e-gul kī ra.anā.ī na thī
kab tire jalvoñ kī ik duniyā tamāshā.ī na thī

tum to duniyā ho badalnā hai vatīra terā
ham kahāñ bande tere Dhab ke tamāshā kyā hai

ye sach hai maiñ huuñ qaid ḳhayāloñ meñ ḳhvāb meñ
jiine ke vāste mire duniyā koī to ho

panāh maañg rahī hai harī-bharī duniyā
na pūchh āh-dil-e-ḳhā-numāñ-ḳharāb kī aañch

ye raat aag lagā de kahīñ na duniyā meñ
ye chāñdnī ye havā.eñ ye māhtāb kī aañch

nazar aa rahe haiñ jo tanhā se ham
so yuuñ hai ki bhar paa.e duniyā se ham

samajhnā thā duniyā ko yuuñ bhī muhāl
samajhte the duniyā ko duniyā se ham

zid meñ duniyā kī bahar-hāl milā karte the
varna ham donoñ meñ aisī koī ulfat bhī na thī

kār-e-duniyā kareñ kuchh adāvat to ho Tuk tabī.at badalne kī sūrat to ho
ham agar ḳhud se laḌte-jhagaḌte rahe zindagī ke anāsir bikhar jā.eñge

maiñ āshiq huuñ badal Daalā mujhe ishq-o-qanā.at ne
ujālā dil meñ thā duniyā mirī Thokar pe rakkhī thī

ilāhī ḳhair kyā koī musībat aane vaalī hai
jo ik duniyā se khiñchtā ho vo mujh par mehrbāñ kyuuñ ho

duniyā meñ to mamnūa hai jannat meñ hai jaa.ez
kyā baat hai vaa.iz kī yahāñ aur vahāñ aur

do balā.eñ aaj kal apnī sharīk-e-hāl haiñ
ik balā-e-dard-e-duniyā ik balā-e-dard-e-dil