Tags-Duniya

rañg-e-mahfil dekh kar duniyā ne nazreñ pher liiñ
āshnā jitne bhī the nā-āshnā hone lage

mire ash.ār meñ muzmar haiñ lākhoñ dhaḌkaneñ dil kī
maiñ ik duniyā kā ġham dil kī zabānī le ke aayā huuñ

har roz taaza manzil o har shab nayā maqām
mohlat nahīñ qayām kī duniyā hai kyā maqām

in badalte hue rañgoñ ke tamāshe pe na jā
ye jo duniyā hai to apnā ise me.aar na kar

koī ḳhurshīd sā duniyā pe chamaktā huā tū
kisī dīvār se saaya sā nikaltā huā maiñ

ḳhushiyoñ ke baTvāre tak hī ūñche nīche aage pīchhe
duniyā ke miT jaane kā Dar jitnā terā utnā merā

ab koī ġham-gusār hamārā nahīñ rahā
duniyā ko e'tibār hamārā nahīñ rahā

ab mujh se ye duniyā mirā sar maañg rahī hai
kambaḳht mire aage savālī hī rahegī

yuuñ subuk-dosh huuñ jiine kā bhī ilzām nahīñ
aah itnī baḌī duniyā meñ koī kaam nahīñ

phir ujālā hī ujālā nazar aatā hai 'sirāj'
dil ho bedār to duniyā meñ kabhī shaam nahīñ

vo bhī din the ki maiñ yahī duniyā
terī āñkhoñ se dekhtī thī kabhī

lohār kī bhaTTī hai ye duniyā
bande haiñ azaab kī rutoñ meñ

āñkhoñ ke bin maiñ ne duniyā dekh lī
apne hī hāthoñ se maiñ ne jañg jiit lī

mahv-e-hairat huuñ ye duniyā se judā kyā chiiz hai
aap kā paiġhām be-harf-o-sadā kyā chiiz hai

hai duniyā meñ zabāñ merī agar band
magar ma.anī ke mujh par kab haiñ dar band

kisī ko sāda-dilī kā badla milā hī kab hai jo ab milegā
vafā bhī duniyā meñ ek shai hai magar vo ab mo'atabar nahīñ hai

sair kar duniyā kī ġhāfil zindagānī phir kahāñ
zindagī gar kuchh rahī to ye javānī phir kahāñ

hayāt-o-marg-o-tulū-o-ġhurūb hai duniyā
ki par sameTtā hai koī toltā hai koī

duniyā meñ koī rañj se baḌh kar ḳhushī nahīñ
vo bhī hameñ nasīb kabhī hai kabhī nahīñ

dushman kī raah rok ke baiThā huuñ aaj maiñ
duniyā kā rāsta hai tumhārī galī nahīñ