Tags-Dushman

kise tū sunātā hai ham-nashīñ ki hai ishva-e-dushman-e-aql-o-dīñ
tire kahne kā hai mujhe yaqīñ maiñ tire Darāne se Dar gayā

maiñ ne dushman ko mahārat pe koī daad na dī
mere andar se koī bol paḌā zindabād

tabī.at apnī hai kyuuñ mukaddar nahīñ samajhtā na samjhe dilbar
karegā dushman bhī rahm ham par agar ḳhudā apnā mehrbāñ hai

lage bujhātā nahīñ vo dushman jalan ye hai pheñk rahā hai tan-man
charāġh sā dāġh-e-dil hai raushan diyā-salā.ī hai ustuḳhvāñ hai

dost dushman se ziyāda tez rakhte haiñ chhurī
barhaman bhī pesha ab karne lage qassāb kā

kisī ke jī ke ta.iiñ letā hai dushman
mirā to le gayā hai āshnā jī

jahāñ na tū ho na koī hamdard ho na koī sharīf dushman
maiñ sochtā huuñ mujhe vo māhaul kis tarah sāzgār hogā

merī hī jaan ke dushman haiñ nasīhat vaale
mujh ko samjhāte haiñ un ko nahīñ samjhāte haiñ

ek to mushkil vafā ke marhale
aur phir dushman jahāñ hai āj-kal

tujhe kyā ilm ke har choT pe taare nikalte haiñ
vo aadam hī nahīñ jis kā koī dushman nahīñ hotā

terī ḳhātir aziiz hai varna
mujh ko dushman kī dostī se ġharaz

sar-ba-kaf hind ke jāñ-bāz-e-vatan laḌte haiñ
teġh-e-nau le saf-e-dushman meñ ghuse paḌte haiñ

kisī hālat meñ nahīñ fikr se dushman ġhāfil
āfat-e-murġh hai rañgīn ho bādām safed

sifat-e-kīna mirā ghar hai falak ke dil meñ
girah-e-dushman-e-ḳhātir meñ bañdhā rahtā huuñ

ḳhud ko mumtāz banāne kī dilī-ḳhvāhish meñ
dushman-e-jāñ se milī merī anā sāzish meñ

thā yaqīnan dostoñ kī saf meñ ik dushman mirā
be ḳhabar pā kar achānak jis ne hamla kar diyā

2
kal sar-e-shām dushman ne aate hue

ham se milte haiñ vahī dushman-e-jānī kī tarah
jis kisī ko bhī yahāñ apnā banāyā ham ne

chuum kar haath mirā detā hai vo dil ko kasak
kaisā dushman hai ki jo jaan se pyārā bhī hai

maujeñ Takrā.ī huiiñ dushman bhī niklīñ dost bhī
pīchhe kashtī ko Dhakelā de ke sāhil kā patā