Tags-Dushman

ajiib jalve haiñ hosh dushman ki vahm ke bhī qadam ruke haiñ
ajiib manzar haiñ hairat-afzā nazar jahāñ thī vahīñ thamī hai

hosh-o-ḳhirad adū-e-ishq ishq hai dushman-e-ḳhirad
hai na huā na ho kabhī aql se sāz-bāz-e-ishq

marg-e-dushman kā ziyāda tum se hai mujh ko malāl
dushmanī kā lutf shikvoñ kā mazā jaatā rahā

dushman agar vo dost huā hai to kyā ajab
yaañ e'timād-e-dostī-e-jism-o-jāñ nahīñ

dost dushman sabhī hue haiñ tere
kyā burā.ī kā ab zamānā hai

dushman ba-nām-e-dost banānā mujhe bhī hai
us jaisā ruup us ko dikhānā mujhe bhī hai

apne muḳhlis dostoñ par vaar maiñ kaise karūñ
koī dushman sāmne aa.e to jauhar dekhnā

dushmanī kā koī dāv-kārī nahīñ
jiit lete haiñ dushman ko ehsān se

mere siine pe to dushman kā koī zaḳhm nahīñ
mere pahlū meñ jo utrā hai to ḳhanjar merā

koshish hai gar us kī ki pareshān karegā
vo dushman-e-jāñ dard ko āsān karegā

bhīgī palkeñ niiñd se ḳhālī
chain ke dushman rain-basere

vo ḳhaak dhuul chaTā.eñge apne dushman ko
jo dil na qalb-e-amīr-e-sipāh rakhte haiñ

āshiqoñ ko ai falak devegā tū āzār kyā
dushman-e-jāñ un kā thoḌā hai dil-e-bīmār kyā

kuchh na kuchh 'sāqib' ne paidā kar liyā
ye zamīñ to dushman-e-abyāt thī

bazm-e-dushman hai ḳhudā ke liye ārām se baiTh
baar baar ai dil-e-nādāñ tujhe kyā hotā hai

rashk dushman na sah sakegā 'nizām'
ye bhī nā-chār apne jī se hai

kuchh samajh kar us mah-e-ḳhūbī se kī thī dostī
ye na samjhe the ki dushman āsmāñ ho jā.egā

baḳht bargashta vo nārāz zamāna dushman
koī merā hai na ai 'hijr' kisī kā maiñ huuñ

vo satātā hai alag charḳh-e-sitam-gār alag
saikḌoñ dushman-e-jāñ haiñ mire tanhā maiñ huuñ

pahchāntā vo ab nahīñ dushman ko dost se
kis qaid se asīr-e-mohabbat rihā huā