Tags-Dushman

shikoh-e-zāt se dushman kā lashkar kaañp jaatā hai
agar kirdār puḳhta ho sitamgar kaañp jaatā hai

ishq kyā itnā baḌā jurm hai? jis par yāvar!
dushman-e-jān hue jaan se pyāre saare

banā Daalā zamāne bhar ko dushman
faqat ik ajnabī kī dostī ne

apnā dushman bhī dikhā.ī nahīñ detā ho jise
aisā lashkar to saf-ārā bhī nahīñ ho saktā

ġham mirā dushman-e-jānī hai kaho yā na kaho
mere aañsū kī zabānī hai kaho yā na kaho

agar tū dost hai to phir ye ḳhanjar kyuuñ hai hāthoñ meñ
agar dushman hai to āḳhir mirā sar kyuuñ nahīñ jaatā

kis ko apnā kaheñ ki ai 'nāsir'
har hasīñ shaḳhs hai vafā dushman

ham bhī dushman to nahīñ haiñ apne
ġhair ko tujh se mohabbat hī sahī

ka.ī atrāf khulte jā rahe haiñ
vo dushman thā magar itnā nahīñ thā

bigaḌte kyuuñ ho aapas meñ shikāyat kar hī lete haiñ
adū kā tazkira dushman kā charchā ho hī jaatā hai

mohabbat ke dushman haiñ jitne bhī 'najma'
unheñ aa.ina ham dikhāte raheñge

naġhma dilkash hai dushman andalīb-e-zār kā
hai qafas meñ band honā kholnā minqār kā

dushman pe bhī nigāh rahe aib meñ hai vo
ye kyā ki sirf chāhne vāloñ ko dekhiye

na kisī ke dushman-e-jāñ hue na kisī ko dushman-e-jāñ kiyā
yahī baat thī ki jo ġhair se bhī hamesha apnī banī rahī

dushman ke nishāne par kab tak yūñhī baiTheñge
ḳhud ko bhī bachānā hai aur vaar bhī karnā hai

us vafā-dushman se paimān-e-vafā hai ustuvār
zer-e-sañg-e-saḳht hai phir dast-e-yārāñ in dinoñ

is ġham ne kaisī shakl badal lī ki kal talak
dushman thā merī jaan kā ab jaan ho gayā

ghar darvāze se duurī par saat samundar biich
ek anjāne dushman kī hai ghaat samundar biich

uThtī nahīñ nigāh bhī ai dil tire sabab
kis se mujhe shikast ho dushman jo tū na ho