Tags-Dushman

vo hazār dushman-e-jāñ sahī mujhe phir bhī ġhair aziiz hai
jise ḳhāk-e-pā tirī chhū ga.ī vo burā bhī ho to burā nahīñ

muhibboñ ko kareñ haiñ qatl dushman ko jalāte haiñ
butoñ kī bhī miyāñ sāhib nirālī hī ḳhudā.ī hai

aap jo hañste rahe shab bazm meñ
jaan ko dushman kī maiñ royā kiyā

baḌhā.e dostī kā haath dushman bhī tah-e-dil se
lagā lete haiñ siine se ḳhushī se baat karte haiñ

na dushman ke chubhā ḳhaar us galī meñ
hamāre vāste suulī khaḌī hai

dushman dhund hai kab se merī āñkhoñ ke darpai
hijr kī lambī kaalī rāteñ kājal ho jaa.eñ

kisī kā ek hai dushman to dost-dār hai ek
hamārā hijr adū ek vasl yaar hai ek

khiñch ke dushman se gale teġh-e-ravāñ miltī hai
dam dafnā karne ko ġhārat-gar-e-jāñ miltī hai

sar-ba-kaf hind ke jāñ-bāz-e-vatan laḌte haiñ
teġh-e-nau le saf-e-dushman meñ ghuse paḌte haiñ

ye jo Darne lagā hai ham se dushman
ḳhudā pesh-e-nazar hogā hamārā

mohabbat hai to apne se adāvat hai to apne se
haiñ aap hī dost apne ham haiñ aap hī apne dushman ham

dushman-e-aish kā maiñ dushman huuñ
go ki the farz hurmat-e-ramazāñ

dushman ho koī ki dost merā
har ek ke haq meñ maiñ duā huuñ

reg-e-sāhil kī tab-o-tāb kī dushman Thahrī
lahr jo bhī pas-e-dīvār-e-havā se aa.ī

ab mujhe lagtā hai dushman mirā apnā chehra
mujh se pahle ye mirā haal batā detā hai

mire dushman ke jo hālāt haiñ un se ye zāhir hai
ki ab shīshe se Takrāne pe patthar TuuT jaatā hai

ahd-e-āsūdgi-e-jāñ meñ bhī thā jaañ se aziiz
vo qalam bhī mire dushman kī anā chāhtī hai

barābar merī turbat ke kiyā hai dafn dushman ko
ye achchhā mere hisse meñ jahannum kā azaab aayā

sar-e-turbat bhī ghoḌe par havā ke vo savār aa.e
qayāmat ham-ināñ aa.ī na dushman ham-rikāb aayā

go dostī na sahī dushmanī nibāh to dī
milā nasīb se dushman vafā-shi.ār mujhe