Tags-Dushman

ajab is kā kyā na samā.ūñ maiñ jo ḳhayāl-e-dushman-o-dost hai
vo maqām huuñ ki guzar nahīñ vo makān huuñ ki patā nahīñ

bahut royā huuñ maiñ jab se ye maiñ ne ḳhvāb dekhā hai
ki aap aañsū bahāte sāmne dushman ke baiThe haiñ

tire nām-o-nasab se kyā ġharaz ai dushman-e-jānāñ
mile zaḳhmoñ se fursat to tire alqāb dekheñge

is dil ko ham-kanār kiyā ham ne kyā kiyā
dushman ko dost-dār kiyā ham ne kyā kiyā

maiñ samundar ke talātum se bhī kuchh sīkhtā huuñ
isī taqsīr pe dushman hue sāhil mere

maiñ dhīre dhīre un kā dushman-e-jāñ bantā jaatā huuñ
vo āñkheñ kitnī qātil haiñ vo chehra kaisā lagtā hai

kis kis ke jaur uThā.eñge aage ko dekhiye
dushman hai charḳh-e-pīr zamān-e-shabāb meñ

tere ghar aa.eñ to īmān ko kis par chhoḌeñ
ham to ka.abe hī meñ ai dushman-e-dīñ achchhe haiñ

uTThā thā muñh chhupā.e hue maiñ hī sub.h ko
jaatā thā maiñ hī raat ko dushman ke saath saath

mujh se kahte ho ki maiñ hargiz nahīñ piitā sharāb
maiñ tumhārā dost yā dushman ki sharmāte ho tum

maiñ jo dushman ke bulāve par nikal aayā huuñ 'mid.hat'
bar-sar-e-maidān meñ kuchh Thānñā hī chāhtā huuñ

mas.ala ye hai maiñ dushman ke qarīñ pahuñchūñgā
aur kabūtar mirī talvār pe aa baiTheñge

jalegā dil tumheñ bazm-e-adū meñ dekh kar merā
dhuāñ ban ban ke armāñ mahfil-e-dushman se nikleñge

ham haar to jaate hī ki dushman ke hamāre
sau pair the sau haath the ik sar hī nahīñ thā

dushman nazar paḌā to miTīñ ranjisheñ tamām
laḌne ko saarā shahr hī tayyār ho gayā

rasā.ī kahāñ bazm-e-dushman meñ apnī
ki ham bhī unheñ ik nazar dekh lete

ek dam meñ deñge ham bas dhueñ bikher us ke
ho gayā to hone do dushman āsmāñ apnā

ishq meñ huā un ke dushman ik jahāñ apnā
dard-e-dil kareñ kis se jā kar ab bayāñ apnā

kiyā hai faash parda kufr-o-dīñ kā is qadar maiñ ne
ki dushman hai barhaman aur adū shaiḳh-e-haram merā

kam se kam aap to rakh liije bharam yaarī kā
vo to dushman haiñ nā ādāb nahīñ kah sakte