Tags-Eid

tum jo mire sheroñ ke muḳhātib the na hoge
āḳhir meñ tumheñ sirf tumhe īd-mubārak

sargoshī ne patthar ko sabaq yaad dilāyā
paanī ne likhā ā.īne pe īd-e-mubārak

tanhā.ī sī tanhā.ī ki dīvār bhī shashdar
ab khul ke kahe yā na kahe īd-e-mubārak

haañ mujh se jise jis se mujhe jo bhī gila ho
ābād rahe shaad rahe īd-e-mubārak

aisā ho sab insān hoñ ḳhush itne ki har roz
ik dūsre se kahtā phire īd-e-mubārak

har roz ho roz-e-īd to bhī
tū mujh se na ham-kanār hogā

us mehrbāñ nazar kī ināyat kā shukriya
tohfa diyā hai eid pe ham ko judā.ī kā

iid kā din huā kartī thī har ik raat mujhe
haa.e vo vaqt ki raas aatī thī barsāt mujhe

tū aa.e to mujh ko bhī
iid kā chāñd dikhā.ī de

eid-gāh ab to maiñ tanhā hī nikal jaatā huuñ
saath meñ tujh ko bhī lā.ūñ to maiñ lā.ūñ kaise

aaj maiñ eid manā.ūñ to manā.ūñ kaise
tujh ko siine se lagā.ūñ to lagā.ūñ kaise

chhūTtā iid ke din bhī na giraftāroñ ko
sūrat-e-tauq-e-gulū-gīr gale mil jaatā

ba-roz-e-īd bhī roze ke jaisī hālat hai
amīr-e-shahr se lekin savāl thoḌī hai

āzmā.ish meñ hai vo ghaḌī iid kī chāñd ne jis ke aane kī tā.īd kī
ik phaTe pairahan par pasīne kī tah ek ghar ḳhushbuoñ meñ nahātā rahā

badle dumbe ke kareñ riñd usī ko qurbān
īd-e-qurbāñ meñ jo sun paa.eñ bayān-e-vā.iz

iid kā din hai gale mil liije
iḳhtilāfāt haTā kar rakhiye

iid hai qatl mirā ahl-e-tamāshā ke liye
sab gale milne lage jab ki vo jallād aayā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

tumhārī abrū-e-kaj kā thā duuj kā dhokā
siyāh hotā agar iid kā hilāl huā

qurbān sau tarah se kiyā tujh par aap ko
tū bhī kabhū to jaan na aayā bajā.e iid