Tags-Aansoo

vo kyuuñ mujh ko tasallī deñ vo kyuuñ pochheñ mire aañsū
ghirā hai abr-e-ġham āñkhoñ ko gauhar-bār rahne deñ

laḳht-e-dil yāqūt meñ aañsū haiñ motī āb-dār
aao dekho jauharī bāzār āñkheñ ho ga.iiñ

chaman chaman kahīñ aañsū ghuTā ghuTā kahīñ aah
banā rahā hai na.ī kā.enāt ishq-e-tabāh

larzāñ tarsāñ bar-sar-e-mizhgāñ ḳhuun ke aañsū haiñ 'tāriq'
sham-e-farozāñ shahr meñ le kar ḳhūnī manzar dekhā hai

chaar din vasl meñ hañs lene do
aaTh aaTh aañsū rulāyā na karo

vaqt-e-ruḳhsat mire hamrāh koī kab aayā
aur agar lauT ke aa.e bhī to aañsū aa.e

aañsū kī kyā bisāt magar josh-e-ishq ne
qatre ko mauj mauj ko tūfāñ banā diyā

dekh kar un kī nigāh-e-lutf ik muddat ke baad
kyā batā.eñ kyā ḳhayāl aayā ki aañsū aa ga.e

raushnī lene chale the aur andhere chhā ga.e
muskurāne bhī na paa.e the ki aañsū aa ga.e

āḳhirash rishta to ham meñ ik ḳhushī ik ġham kā thā
muskurāte jā.iye aañsū bahāte jā.iye

motī hai ye palak par ruḳhsār par hai shabnam
gir kar zamīñ pe aañsū be-ābrū kare hai

in āñkhoñ meñ aañsū the mirā haal jo dekhā
manzil ne qadam chuum liye aabla pā ke

aañsū jo rukā vo kisht-e-jāñ meñ
bārish kī misāl aa gayā hai

bhare hue chashm-e-tar meñ aañsū jigar meñ bhaḌkī huī tap-e-ġham
ye aag hai aur ye hai paanī ye aag paanī hai aur ham haiñ

aañkh se Tapkā jo aañsū vo sitārā ho gayā
merā dāman aaj dāmān-e-surayyā ho gayā

ḳhaak meñ zid se milāo na mire aañsū ko
sachche motī ko munāsib nahīñ jhūTā kahnā

mare jis par na chaar aañsū bahā.e us ne murde par
huā sābit ki paanī bah gayā chashm-e-muravvat kā

ghaas meñ jazb hue hoñge zamīñ ke aañsū
paañv rakhtā huuñ to halkī sī namī lagtī hai