Tags-Aansoo

har ek aañkh meñ aañsū har ek lab pe fuġhāñ
ye ek shor-e-qayāmat sā kū-ba-kū kyā hai

baḌī der tak maiñ ne būḌhe nujūmī kī bāteñ sunīñ
aur ābād rāhoñ pe ḳhush-posh joḌoñ ko aañsū kī chilman se dekhā kiyā

vahī tishna-labī āñkhoñ meñ sahrā
vahī mizhgāñ pe ik aañsū dharā thā

sar-e-mizhgāñ mire aañsū nahīñ haiñ
sulūk-e-dostāñ rakkhā huā hai

ye koī mas.ala na ban jaa.e
ek aañsū hai qahqahoñ ke beach

Tap-Tap aañkh se aañsū Tapke 'ājiz' āh-e-sard ke saath
mere sāmne nazr-e-ātish jab merī tasvīr huī

aaj aañsū tum ne poñchhe bhī to kyā
ye to apnā umr bhar kā kaam hai

aag duniyā kī lagā.ī huī bujh jā.egī
koī aañsū mire dāman pe bikhar jaane de

haal pūchhā na kisī ne mere aañsū poñchhe
kyā kisī se bhī nahīñ maiñ ne mohabbat kī hai

kisī ko denā ye mashvara ki vo dukh bichhaḌne kā bhuul jaa.e
aur aise lamhe meñ apne aañsū chhupā ke rakhnā kamāl ye hai

rūdād-e-ġham-e-ulfat un se ham kyā kahte kyūñkar kahte
ik harf na niklā hoñToñ se aur aañkh meñ aañsū aa bhī ga.e

tasavvur-e-ruḳh-e-jānāñ kiye hue ham log
hamārī aañkh meñ aañsū nahīñ sitārā hai

yuuñ hī tūfāñ jo uThāte rahe kuchh din 'naushād'
aag duniyā meñ lagā deñge hamāre aañsū

aag ik aur lagā deñge hamāre aañsū
nikle āñkhoñ se agar dil ke sahāre aañsū

mujh ko sone na diyā ashk-fishānī ne mirī
raat bhar ginte rahe charḳh ke taare aañsū

māh-o-anjum pe na phir apne kabhī naaz kare
dekh le charḳh kisī din jo hamāre aañsū

ḳhūn-e-dil ḳhūn-e-jigar bah gayā paanī ho kar
kuchh na kaam aa.e mohabbat meñ hamāre aañsū

merī qismat meñ hai ronā mujhe ro lene do
tum na is tarah bahāo mire pyāre aañsū

us masīhā kī jo furqat meñ huuñ royā shab-bhar
ban ga.e charḳh-e-chahārum ke sitāre aañsū

lutf ab aayā mirī ashk-fishānī kā huzūr
pyārī āñkhoñ se kisī ke bahe pyāre aañsū