Tags-Aansoo

aañkh se Tapkī jo aañsū kī laḌī
qāfila ġham kā ravāna ho gayā

aañsū to tere dāman poñchhe hai vaqt girya
ham ne na rakhī muñh par ai abr-e-āstīñ bhī

apne aañsū haiñ tumhāre nahīñ ro saktā maiñ
aaj āñkhoñ se sitāre nahīñ ro saktā maiñ

us din barkhā sharmā.egī bādal kī chādar oḌhe
āñkhoñ se bahtā aañsū jab bhed diloñ ke kholegā

tanhā.ī meñ āñkhoñ se nikal aate haiñ aañsū
goyā hai fazā meñ kisī dil-gīr kī āvāz

jo hīroñ ke ruup meñ dar dar apne aañsū baañT rahe haiñ
un fan-kāroñ par pheñkeñge kab tak duniyā vaale patthar

diloñ meñ dard hī utnā kashīd rakkhā hai
ki aañkh aañkh ne aañsū kashīd rakkhā hai

dil kī har baat kah ga.e aañsū
gir ke āñkhoñ se rah ga.e aañsū

mire aañsū tirī bedād kā parda na kholeñge
abas ye bad-gumānī hai maiñ kab royā kahāñ royā

deñ pāki-e-dāman kī gavāhī mire aañsū
us yūsuf-e-bedard kā e.ajāz to dekho

dil lubhāte hue ḳhvāboñ se kahīñ behtar hai
ek aañsū ki jo āñkhoñ ko munavvar kar de

jis qadar aañsū gire utnā hī insāñ ho sakā
zindagī shāyad ba-qadr-e-ġham banā saktā huuñ maiñ

merī āñkhoñ meñ haiñ aañsū tere dāman meñ bahār
gul banā saktā hai tū shabnam banā saktā huuñ maiñ

sāvan meñ aañsū ya.anī
barsāteñ barsātoñ meñ

ḳhushk āñkheñ phīkī phīkī sī hañsī nazroñ meñ yaas
koī dekhe ab mujhe aañsū bahānā aa gayā

roī hai saarī raat añdhere meñ be-kasī
aañsū bhare hue haiñ charāġh-e-mazār meñ

na jaane kis liye āñkhoñ meñ aa ga.e aañsū
zarā sī baat ko itnā baḌhā rahe kyuuñ ho

tumhārī aañkh meñ aañsū dikhā.ī dete haiñ
tum itnī zor se hañs ke chhupā rahe kyuuñ ho

ek aañsū se kamī aa jā.egī
ġhāliban dariyāoñ ke iqbāl meñ

chale aate haiñ be-mausam kī bārish kī tarah aañsū
basā-auqāt rone kā sabab kuchh bhī nahīñ hotā