Tags-Aansoo

aaj tak ham ko qalaq hai usī rusvā.ī kā
bah ga.e the jo bichhaḌne pe hamāre aañsū

tum ko rimjhim kā nazāra jo lagā hai ab tak
ham ne jalte hue āñkhoñ se guzāre aañsū

laal o gauhar ke ḳhazāne haiñ ye saare aañsū
koī āñkhoñ se churā le na tumhāre aañsū

tū to kahtā thā na ro.eñge kabhī tere liye
aaj kyuuñ aa ga.e palkoñ ke kināre aañsū

jahāñ gireñ mire aañsū gulāb khil jaa.eñ
bharā huā hai lahū dil ke ābgīne meñ

hālat pe merī un ke bhī aañsū nikal paḌe
dekhā gayā na yaas meñ aalam nigāh kā

nahīñ ab zabt baaqī nā-tavāñ huuñ
mire aañsū nihāyat rāz-dāñ the

ujle motī ham ne māñge the kisī se thaal bhar
aur us ne de diye aañsū hameñ rumāl bhar

mere aañsū the un kī hañsī kā sabab
roī shabnam to gul muskurāne lage

vaqt-e-ruḳhsat vo aañsū bahāne lage
dil dukhāne ke manzar suhāne lage

mornī kī ye ḳhvāhish vajd meñ aa kar nāche mor
pyaas bujhāne ko de de bas do qatre aañsū

shāḳh-e-mizhgāñ ke parinde haiñ ye aañsū goyā
āb-o-dāna liye taqdīr nikal aa.ī hai

ro.e tamām umr magar is hunar ke saath
aañsū palak pe aayā na kāġhaz hī nam huā

jis se ho aañsū ḳhūn-e-jigar ban jaa.e aqīq-o-la.al-o-guhar
ḳhurshīd-o-qamar aur sīm-o-zar ai jaan magar hai partav-e-ruḳh

ik aañsū kah gayā sab haal dil kā
na samjhā thā ye zālim be-zabāñ hai

jis phuul kī har pañkhuḌī hotī hai motī kī laḌī
us phuul kī ḳhātir kabhī aañsū bahā.eñ kis tarah

jaane kis ḳhaak meñ poshīda haiñ aañsū mere
kin fazāoñ meñ muallaq haiñ tumhārī bāteñ

tamām abr pahāḌoñ pe sar paTakte rahe
ġharīb dahkāñ ke aañsū magar Tapakte rahe

ḳhushk putlī se koī sūrat na Thahrā.ī ga.ī
aañkh se aañsū ga.e merī ki bīnā.ī ga.ī

ab ye aañsū haiñ ki rukte hī nahīñ haiñ ham se
dil kī āvāz hī pahle na sunā.ī jaatī