Tags-Aansoo

machhliyāñ laḳht-e-jigar bantī haiñ dariyā aañsū
kis gul-e-tar ko huā shauq-e-shikār-e-dariyā

dekh kar ashk-e-musalsal ko vo aañsū bhar laa.e
laakh motī ke evaz do dur-e-shahvār bike

shaam kī bhīgī huī palkoñ meñ phir
koī aañsū aa.e aur taarā bane

jaane dil kā aañkh se kaisā rishta hai
choT lage to aañkh se aañsū bahtā hai

un ke aa jaane se kuchh tham se ga.e the aañsū
un ke jaate hī magar rone ke aadī ro.e

mirī palkoñ se kuchh ummīdeñ aañsū ban ke yuuñ jhaḌtī haiñ jaise sūkhe patte shāḳh se jhaḌte haiñ patjhaḌ meñ
mere ehsās aur jazbāt bachchoñ kī tarah rote bilakte haiñ

ġham-e-hayāt sharīk-e-ġham-e-mohabbat hai
milā diye haiñ kuchh aañsū mirī sharāb ke saath

us meñ ġham ke na ḳhushī ke aañsū
aañkh patthar kī banī ho jaise

khul jaa.e bharam zabt-e-mohabbat kā na un par
Dartā huuñ kahīñ aañkh meñ aañsū na bhar aa.e

hotī hai shaam aañkh se aañsū ravāñ hue
ye vaqt qaidiyoñ kī rihā.ī kā vaqt hai

merī āñkhoñ meñ vo aañsū nahīñ aane degā
baat rakh legā mirī baat na jaane degā

ham ko aañsū hī milte haiñ siip meñ bhī
vo ashkoñ meñ motī royā karte haiñ

zabt kā sūraj bhī āḳhir shaam ko Dhal hī gayā
ġham kā bādal ban ke aañsū raat bhar barsā bahut

yuuñ chāho to aa saktī ho
maiñ ne aañsū poñchh liye haiñ

ai 'sharaf' jab mazā hai rone kā
nikleñ laḳht-e-jigar bhī aañsū meñ

DabDabāte hī āñkheñ pathrā.ī
kyā hī hasrat bharī thī aañsū meñ

aur kyā thā us kī pursish kā javāb
apne hī aañsū chhupā kar rah gayā

tumheñ aañsū bahāne ko bhī mil jaa.eñ ka.ī kandhe
magar mujh ko aziyyat meñ pareshāñ kaun dekhegā

mahfil ke biich sun ke mire soz-e-dil kā haal
be-iḳhtiyār sham.a ke aañsū Dhalak paḌe

na pī sako to idhar aao poñchh duuñ aañsū
ye tum ne sun liye is dil ke sānehāt kahāñ