Tags-Aansoo

ghaas meñ jazb hue hoñge zamīñ ke aañsū
paañv rakhtā huuñ to halkī sī namī lagtī hai

roz achchhe nahīñ lagte aañsū
ḳhaas mauqoñ pe mazā dete haiñ

palkoñ par ye aañsū pyaar kī tauhīn the
āñkhoñ se gire motī ke daane ho ga.e

maiñ ne us se kahā ye aañsū haiñ
us ne mujh se kahā ye paanī hai

abhī to aañkh ke andar hai tairtā aañsū
Tapak paḌā to na ghar hī kahīñ Dubo jaa.e

nok-e-mizhgāñ pe yaad kā aañsū
mausam-e-gul kī sard shabnam hai

us ne aañsū ġhair ke poñchhe jab apne haath se
ham-nashīñ ye mājrā ham dekh kar royā kiye

surḳh-rū be-ābrūī meñ bhī ham 'san.at' rahe
ḳhushk jab aañsū hue laḳht-e-jigar royā kiye

jis ke liye bachcha royā thā aur poñchhe the aañsū baabā ne
vo bachcha ab bhī zinda hai vo mahñgā khilaunā TuuT gayā

maiñ hamesha sochtī thī
aañsū aur dard

'nūr' aqīdoñ ke sho.aloñ meñ rūheñ jaltī dekh chukī haiñ
tum bhī batāo in āñkhoñ se aañsū Tapkeñ yā añgāre

apnī apnī dhun meñ magan haiñ shāmoñ sub.hoñ ke matvāle
sub.h ke aañsū kaun sukhā.e raat ke gesū kaun sañvāre

aur dikhāo apne aañsū
taaki maiñ unheñ tasvīr hī se poñchh duuñ

aap ko ḳhuun ke aañsū hī rulānā hogā
hāl-e-dil kahne ko ham apnā agar baiTh ga.e

ġhair to aañsū pochheñge
dhokā deñge apne log

sab se ziyāda aañsū hote haiñ
ek laḌkī ke paas

maut kī āġhosh meñ girya-kunāñ hai zindagī
aa.iye do chaar aañsū aap bhī ro jā.iye

thā dāġh-e-tamannā rūh-shikan kuchh himmat-e-ġham kaam aa hī ga.ī
dil meñ to baḌe tūfān uThe aañsū na bahe mātam na huā

aañsū bhī bahā kar dekh liye soz-e-ġham-e-pinhāñ kam na huā
dil meñ tirī ulfat kā sho.ala sho.ala hī rahā shabnam na huā

tere aariz pe ye Dhalke hue sīmīñ aañsū
merī afsurdagi-e-ġham kā mudāvā to nahīñ