Tags-Aansoo

aañsū pahlī shart hai is samjhaute kī
ġham to sāñsoñ kā jurmāna hotā hai

na āñkhoñ meñ kabhī aañsū na hoñThoñ par kabhī naale
na ham qismat ko rote haiñ na ham fariyād karte haiñ

saada kāġhaz pe ḳhuun ke aañsū
ab use ḳhat meñ aur kyā likkhūñ

kabhī girāne na do aañsū haal par mere
lo aao paanī to Tapkāo merī jaañ muñh meñ

muddat ke ba.ad us ne jo kī lutf kī nigāh
jī ḳhush to ho gayā magar aañsū nikal paḌe

vo apne aañsū
ek nāzuk hair dryer se sukhātī hai

ālam-e-nazā meñ palkoñ pe larazte aañsū
ishq kā āḳhirī paiġhām ilāhī tauba

zindagī jin kī rifāqat pe bahut nāzāñ thī
un se bichhḌī to koī aañkh meñ aañsū bhī nahīñ

na ġham fursat hī detā hai na aañsū band hote haiñ
barastā jā rahā hai meñh badlī bantī jaatī hai

bahe jab aañkh se aañsū baḌhā soz-e-jigar apnā
hamesha meñh baraste meñ jalā kartā hai ghar apnā

nahīñ thamte nahīñ thamte mire aañsū 'bedam'
rāz-e-dil un pe huā jaatā hai ifshā dekho

bāñkpan un kā mash.hūr thā merī dīvāngī par hamesha hañse
lekin āñkhoñ se aañsū chhalakne lage sāmne jab hamārā mazār aa gayā

dekhā ye jab ki yās-o-tabāhī hai hashr-e-ishq
aañsū bahā bahā ke bahut sochte rahe

mujh ko āñkhoñ meñ jagah do chande
phir girā dījiyo aañsū kī tarah

ham ko har-chand gavārā nahīñ aañsū lekin
apnī jholī meñ ye ḳhairāt bhī aa jaatī hai

apnī hālat pe aañsū bahāne lage
sard rātoñ meñ ḳhud ko jagāne lage

ka.ī aañsū mirī ā.ankhoñ meñ hī tahlīl hue
dil meñ aa.e to phir ik yaad manā lī ham ne

aa.e haiñ ġham-e-ishq meñ aise bhī maqāmāt
dil ḳhuun huā aañkh se aañsū bhī na Dhalke

pās-e-nāmūs-e-ishq thā varna
kitne aañsū palak tak aa.e the

shajar-e-ishq to māñge hai lahū ke aañsū
tab kahīñ jā ke koī shāḳh harī aave hai