Tags-Aansoo

maiñ jis kī aañkh kā aañsū thā us ne qadr na kī
bikhar gayā huuñ to ab ret se uThā.e mujhe

sab sāmān baham haiñ 'sājid' likhne likhāne ke
ḳhūn-e-jigar aur aañsū dil kī davāt akelā kamra

chale aate haiñ be-mausam kī bārish kī tarah aañsū
basā-auqāt rone kā sabab kuchh bhī nahīñ hotā

aañsū kabhī malāl kabhī terā ġham kabhī
kyā kyā na mere zaḳhm kā marham kiyā gayā

ḳhatm hote hue aañsū hoñ ki thamtā huā dard
ham se ab aur sazā.eñ nahīñ dekhī jātīñ

sabhī taare sabhī jugnū mere
ab aur āñchal hai aur aañsū mere

aañsū ḳhushk hue jab se
āñgan meñ uḌtī hai dhuul

kabhī aañsū kā qatra misl-e-gauhar ho nahīñ saktā
ġhalat hai abr-e-naisāñ dīda-e-tar ho nahīñ saktā

hote hī shaam jalne lagā yaad kā alaao
aañsū sunāne dukh kī kahānī nikal paḌe

taḌap ke lauT ke aañsū bahā ke dekh liyā
lagī na dil kī tujhe dil lagā ke dekh liyā

sabab us ke sivā kuchh bhī nahīñ aañsū bahāne kā
ki shabnam be-sabātī-e-jahāñ pur-ashk-bār aa.ī

purāne daañv par har din na.e aañsū lagātā hai
vo ab bhī ik phaTe rūmāl par ḳhushbū lagātā hai

mere har aañsū meñ ik ā.īna-e-tasvīr hai
mere har naale meñ hai tarz-e-fuġhān-e-lucknow

koī to hai jo is hañste baste manzar meñ
chupke se āvāz meñ aañsū rakh jaatā hai

aañsū pūchhūñ huuñ dilāsā de de
mannateñ kar ke maiñ samjhātā huuñ

chhoḌ kar aañsū ko laḳht-e-dil gayā ham-rāh-e-āh
naav ḳhushkī meñ chalī āb-e-ravāñ be-kār hai

maiñ chup rahā to aañkh se aañsū ubal paḌe
jab bolne lagā mirī āvāz phaT ga.ī

aañsū to bahut se haiñ āñkhoñ meñ 'jigar' lekin
bañdh jaa.e so motī hai rah jaa.e so daanā hai

na ho jazba magar aañsū girāo
na ho ḳhvāhish magar dāñteñ dikhāo

mirī mizha se Tapaktā aañsū ho jaise har Dūbtā sitāra
likhā gayā ho mirī hī palkoñ pe rat-jagoñ kā hisāb jaise