Tags-Aansoo

aañsū ho mai ho zahr ho āb-e-hayāt ho
juz ḳhūn-e-ārzū na mujhe zindagī kī pyaas

vahīñ pe aa ga.e āñkhoñ meñ daf.atan aañsū
jahāñ bhī dekh lī hañstī huī kalī maiñ ne

kitne aañsū haiñ ki palkoñ pe nahīñ aa sakte
kitnī ḳhabreñ haiñ jo chhaptī nahīñ aḳhbāroñ meñ

naam ko bhī na kisī aañkh se aañsū niklā
sham.a mahfil meñ jalātī rahī parvāne ko

aañsū falak kī aañkh se Tapke tamām raat
aur sub.h tak zamīn kā āñchal bhigo ga.e

kahāñ tak ai dil-e-shorīda tū aañsū bahāvegā
shab aa.ī sub.h hone par bas itnā bhī na ro kāfir

maiñ kisht-e-zīst meñ fasloñ kī sūrat
kuchh aañsū bo ga.ī huuñ rafta rafta

is ziyāñ-ḳhāne meñ ik qatre pe kyā kyā guzrī
kabhī aañsū kabhī shabnam kabhī gauhar ban ke

sab se kahnā ḳhushī ke aañsū haiñ
ye bharam āstāñ se sīkhā hai

har choT par zamāne kī ham muskurā.e haiñ
lekin tire ḳhayāl meñ aañsū bahā.e haiñ

kis kis ke aañsū pūchhoge aur kis kis ko bahlāoge
ik din aa.egā tum bhī shāmil un meñ ho jāoge

ye ahd-e-tamannā bhī ik daur-e-qayāmat hai
jab husn piye aañsū aur ishq lahū thūke

mohabbat nā-ravā taqsīm kī qaa.el nahīñ phir bhī
mirī āñkhoñ ko aañsū tere hoñToñ ko hañsī dī hai

is meñ ek janam-bhar ke dukh simTe the
vo aañsū jo palkoñ par lahrāyā thā

mahfil meñ koī soḳhta-jāñ hī nahīñ 'shakīl'
soz-o-gudāz-e-sham.a pe aañsū bahā.e kaun

ḳhāmosh haiñ lab aur āñkhoñ se aañsū haiñ ki paiham bahte haiñ
ham sāmne un ke baiThe haiñ aur qissa-e-furqat kahte haiñ

ek aañsū yaad kā Tapkā to dariyā ban gayā
zindagī bhar mujh meñ ek tūfān sā paltā rahā

guloñ ke maḳhmaleñ āñchal namī se bhiig jaate haiñ
kisī kī yaad meñ shab bhar falak aañsū bahātā hai

tum aa.e bhī to ġham ko saath laa.e
mire aañsū nikal aa.e ḳhushī se

tum ne jī bhar ke satāne kī qasam khaa.ī hai
maiñ ne aañsū na bahāne kī qasam khaa.ī hai