Tags-Aansoo

qatl par mere bahā.e na kisī ne aañsū
daad qātil ko dī ik ek tamāshā.ī ne

dard degī ḳhuun ke aañsū rulā.egī mujhe
zindagī tū aur kis had tak satā.egī mujhe

udaas āñkhoñ se aañsū nahīñ nikalte haiñ
ye motiyoñ kī tarah sīpiyoñ meñ palte haiñ

pahle ro lete the ab galiyoñ ke pheroñ kā hai shaġhl
pahle jo aañsū the ab vo paañv ke chhāle hue

kis qadar 'āġhāz' ubaltā hai sakūñ
tum zarā aañsū bahā kar dekhnā

aañkh se aañsū ban ke baheñ jo aise sab jazbāt nahīñ
dil kā zaḳhm chhupā ke jiinā sab ke bas kī baat nahīñ

ġhairat-e-ishq ne kyā kyā na bahā.e aañsū
sun ke bāteñ tirī ġhairoñ kī zabānī royā

mire laboñ pe koī buuñd Tapkī aañsū kī
ye qatra kaafī thā jalte hue makāñ ke liye

har ek ahd ne likkhā hai apnā nāma-e-shauq
kisī ne ḳhuuñ se likhā hai kisī ne aañsū se

kise miltī haiñ vo āñkheñ mohabbat meñ jo rotī haiñ
mubārak haiñ vo aañsū jin kī arzānī nahīñ jaatī

aañsū jahāñ bhī jis kī bhī āñkhoñ meñ dekhiye
motī samajh ke rishta-e-jāñ meñ piroiye

andhī rāhoñ kī uljhan meñ bechārī ghabrā.ī raat
pahle lahū meñ phir aañsū meñ phir kirnoñ meñ nahā.ī raat

jīvan paikar dhul jā.eñge jis meñ gunāh o savāb samet
aañsū paidā kar hī deñge aisī bārish kā imkān

shahr-āshob meñ aañsū kī tarah phirte haiñ
haa.e vo log kisī ḳhvāb ke paale hue log

us ne bārish meñ chalnā shurūa kar diyā
koī us ke aañsū

kitnī zulfeñ uḌiiñ kitne āñchal uḌe chāñd ko kyā ḳhabar
kitnā mātam huā kitne aañsū bahe chāñd ko kyā ḳhabar

āñkhoñ meñ chhalakte haiñ aañsū dil chupke chupke rotā hai
vo baat hamāre bas kī na thī jis baat kī himmat kar baiThe

taarā taarā hijr ke qissa phaile haiñ
aañsū aañsū dil kā sāgar bahtā hai

har aañsū meñ ātish kī āmezish hai
dil meñ shāyad aag kā dariyā bahtā hai

yahī thartharāte aañsū yahī nīchī nīchī nazreñ
yahī un kī bhī nishānī yahī apnī bhī nishānī