Tags-Aansoo

vo chup-chāp aañsū bahāne kī rāteñ
vo ik shaḳhs ke yaad aane kī rāteñ

bhiig gayā maiñ Duub gayā
ik aañsū aisī barsāt

aah ye aañsū pyāre pyāre
likh de hisāb-e-ġham meñ hamāre

aañkh meñ beTī ke aayā thā magar dekho 'ziyā'
ek aañsū ne hameñ kitnā rulāyā huā hai

haa.e vo daur-e-ishq jab aañsū
dāstān-e-hayāt kahte haiñ

zamāna kahtā hai jis ko hasīn tāj-mahal
vafā kī aañkh se Tapkā huā ik aañsū hai

āñkhoñ meñ nazar aane lage ḳhuun ke aañsū
uTTho ki bas ab surḳh sitāre nikal aa.e

ruḳhsat ke vo aañsū vo nigāhoñ kī udāsī
thī shaam magar sub.h ke taare nikal aa.e

jis aañkh meñ na samātī thī buuñd aañsū kī
ab us ne ġham meñ tire sail-e-ḳhūñ ravāñ dekhā

silsila rone kā sadiyoñ se chalā aatā hai
koī aañsū mirī palkoñ pe Thahartā hī nahīñ

abhī ye zaḳhm-e-masarrat hai nā-shagufta sā
chhiḌak do mere kuchh aañsū hañsī ke chehre par

bijlī kī chamak meñ sho.ale haiñ phūloñ kī hañsī meñ aañsū haiñ
ye 'fazl' vafā kī duniyā hai phir bhī to vafā kā naam nahīñ

ise sāmān-e-safar jaan ye jugnū rakh le
raah meñ tīrgī hogī mire aañsū rakh le

mere aañsū nahīñ haiñ lā-vāris
ik tabassum se rishte-dārī hai

jo terī bazm se uTThā vo is tarah uTThā
kisī kī aañkh meñ aañsū kisī ke dāman meñ

bahut ro.e zamāne ke liye ham
zarā apne liye aañsū bahā leñ

aañsū aañsū jis ne dariyā paar kiye
qatra qatra aab meñ uljhā baiThā hai

maiñ zid kar ke kabhī rotā to aañsū poñchh letī thī
abhī rotā huuñ to shafqat-bharā dāman nahīñ miltā

ye aañsū be-sabab bante nahīñ haiñ
inheñ tum sirf paanī kah ke mat Taalo

auroñ ke dukh meñ āñkheñ bhar aatī haiñ
aise aañsū ḳhālis sachche hote haiñ