Tags-Aansoo

aur koī jo sune ḳhuun ke aañsū ro.e
achchhī lagtī haiñ magar ham ko tumhārī bāteñ

hijr kī shab ġham ke aañsū Dhote Dhote
kājal thak kar gāloñ par so jaatā hai

nigār-e-sub.h ke aañsū sameTne ke liye
guloñ ko vus.at-e-āġhosh kī zarūrat hai

aap ko ḳhuun ke aañsū hī rulānā hogā
hāl-e-dil kahne ko ham apnā agar baiTh ga.e

sitam kī āḳhirī manzil pe iz.hār-e-pashemānī
nikal aate haiñ aañsū yuuñ to har dukhte hue dil se

koī charāġh na aañsū na ārzū-e-sahar
ḳhudā kare ki kisī ghar meñ aisī shaam na ho

merā maulā tire hāthoñ ko salāmat rakkhe
mere aañsū tire rūmāl meñ ḳhush rahte haiñ

ab merī zindagī meñ aañsū haiñ aur na aaheñ
lekin ye ek mīThā mīThā sā rog jī kā

do ghaḌī dard ne āñkhoñ meñ bhī rahne na diyā
ham to samjhe the baneñge ye sahāre aañsū

is tarah merī āñkhoñ se aañsū bahe
be-vuzū hī adā ho ga.ī har namāz

aañkh meñ maut ke kaale kaale aañsū haiñ
ḳhvāb meñ niiñd ko gahrā hote dekhā hai

dil ke pardoñ meñ thiiñ jo jo hasrateñ parda-nashīñ
aaj vo āñkhoñ meñ aañsū ban ke uryāñ ho ga.iiñ

hamārā aañsū vo be-bahā hai nigāh-e-hasrat meñ jach rahā hai
mañgā ke ab us pe chaurahe meñ nisār karne guhar ko chaliye

un hasīñ āñkhoñ se ab lillāh aañsū pūchh lo
tum bhī dīvāne hue jaate ho dīvānoñ ke saath

jis ko dil se lagā ke rakkhā thā
vo ḳhazāna luTā ga.e aañsū

hañsā thā do-ghaḌī barsoñ magar aañsū bahāyā thā
maiñ jab chhoTā thā ik laḌkī se maiñ ne dil lagāyā thā

bichhī thiiñ har taraf āñkheñ hī āñkheñ
koī aañsū girā thā yaad hogā

dandāñ ke āshiqoñ ke aañsū haiñ dur nahīñ haiñ
niklī jo sītlā hai vo bhī to motiyā hai

yaad aayā vahāñ gire the aañsū
ab sabza o gul jahāñ jahāñ hai

ḳhajil apne gunāhoñ se huuñ maiñ yaañ tak ki jab royā
to jo aañsū mirī āñkhoñ se niklā surḳh-rū niklā