Tags-Aansoo

fart-e-ḳhushī meñ aañkh se aañsū nikal paḌe
jab un kā iltifāt gavārā na ho sakā

kabhī vo ḳhuuñ bahātā hai kabhī aañsū bahātā hai
adāvat kī adā meñ tarz-e-ġham-ḳhvārī bhī shāmil hai

hañste hañste nikal paḌe aañsū
rote rote kabhī hañsī aa.ī

maiñ 'shād' tanhā ik taraf aur duniyā kī duniyā ik taraf
saarā samundar ik taraf aañsū kā qatra ik taraf

aañsū taare rañg gulāb sabhī pardes chale jaate haiñ
āḳhir āḳhir tanhā.ī hai kis ne kis kā saath diyā hai

rok le ai zabt jo aañsū ki chashm-e-tar meñ hai
kuchh nahīñ bigḌā hai ab tak ghar kī daulat ghar meñ hai

garebāñ-chāk mahfil se nikal jā.ūñ to kyā hogā
tirī āñkhoñ se aañsū ban ke Dhal jā.ūñ to kyā hogā

shāne talak chaḌhe bin ab aañsū ko kab hai chain
sach hai ki hove tifl ko ārām dosh par

ban ga.ī hai vo iltijā aañsū
jo nazar meñ samā na paa.ī hai

vo ḳhūn-e-hasrat-e-dil se navāz kar aañsū
lahū kā rañg bhī shāmil talāsh kartā hai

dūsroñ ko bhī mazā sunñe meñ aa.e 'bāsir'
apne aañsū kī nahīñ kījiye barsāt pe baat

ishq meñ har tamannā-e-qalb-e-hazīñ surḳh aañsū bahā.e to maiñ kyā karūñ
nā-umīdī hama-vaqt ummīd ke hāshiyoñ ko miTā.e to maiñ kyā karūñ

mere pahlū meñ jo bah nikle tumhāre aañsū
ban ga.e shām-e-mohabbat ke sitāre aañsū

aañsū nikal paḌe haiñ ḳhushī meñ tire huzūr
kis tamkanat ke saath ye dariyā ravāñ huā

surḳh miTTī meñ gire aañsū bane haiñ motī
ḳhaak se DhūñDh ke laatā bhī hai koī koī

hañste hañste hue aañsū bhī nikal aate haiñ
rote rote hue hañstā bhī hai koī koī

na.e aañsū the āstīñ ke liye
dāman-e-dil kabhī kā tar niklā

nikal ga.e mirī āñkhoñ se saikaḌoñ aañsū
ḳhazāna jam.a kiyā aur phir luTā bhī diyā

raat se aañsū mirī āñkhoñ meñ phir aane lagā
yak ramaq jī thā badan meñ so bhī ghabrāne lagā

rafta rafta aañkh se aañsū ravāñ hone lagā
vaqt ke ḳhāke meñ naqsh-e-jāvedāñ hone lagā