Tags-Aansoo

ban hī jaate kabhī hastī ke sahāre aañsū
haa.e ruk hī na sake ham se hamāre aañsū

ek aañsū na bahā.ūñ ġham-e-duniyā ke liye
ġham-e-jānāñ ke liye haiñ mire saare aañsū

jazb hone bhī na paa.e the hamāre aañsū
yaad phir aa ga.e bhūle se tumhāre aañsū

azmat-e-ishq hai pābandī-e-zabt-e-furqat
ya.anī tauhīn-e-mohabbat haiñ hamāre aañsū

ye na hote to qayāmat thā sahar tak jiinā
mere pyāre mirī rātoñ ke sahāre aañsū

TūTtī hai dil-e-ġham-ghīñ pe qayāmat kyā kyā
aa ke palkoñ pe jo rukte haiñ hamāre aañsū

jo Tapke kāsa-e-dil meñ to aalam hī badal jaa.e
vo ik aañsū magar ai chashm-e-tar āsāñ nahīñ hotā

bahr-e-zulmāt pasīna hai mirī āñkhoñ kā
zid na kar kaam ye aañsū kā bhī kar jā.egā

magar 'asar' hai ḳhamosh o hairāñ havās gum chaak dāmāñ
laboñ pe aa.eñ nazar pareshāñ to ruḳh pe aañsū Tapak rahe haiñ

tumhārī furqat meñ merī āñkhoñ se ḳhuuñ ke aañsū Tapak rahe haiñ
sip.har-e-ulfat ke haiñ sitāre ki shām-e-ġham meñ chamak rahe haiñ

kisī kī yaad meñ aañsū kā rishta is tarah rakkho
ki dil pahlū agar badle to chehra tar-ba-tar kyuuñ ho

na koī ḳhvāb, na aañsū na ḳhayāl
kyā ajab qaht paḌā hai mujh meñ

do-ātisha sar-e-ruḳhsār ho ga.e aañsū
guloñ pe qatra-e-shabnam nahīñ sharāb bhī hai

phir vahī yādeñ vahī aañsū vahī āh-o-fuġhāñ
phir vahī dīvār-o-dar hai raat hai tanhā.ī hai

ban ke hasrat samā gayā ik shaḳhs
mujh ko aañsū banā gayā ik shaḳhs

ro diye vo ḳhud bhī mere girya-e-paiham pe aaj
ab haqīqat meñ mujhe aañsū bahānā aa gayā

nazar na ā.eñge ham qahqahoñ kī mahfil meñ
jo dekhnā hai to aañsū bahā ke dekh hameñ

tere dāñtoñ ke tasavvur se na thā gar āb-dār
jo bahā aañsū vo durr-e-be-bahā kyūñkar huā

phir utar aa.e haiñ palkoñ pe sisakte aañsū
phir kisī shaam ke āñchal ko bhigonā hai hameñ

dekhnā kyā huā us kā muḌ kar mujhe
merī palkoñ pe aañsū sitāre hue