Tags-Aansoo

itnā mat ro aañsū ke saath
ḳhvāb bhī aksar bah jaate haiñ

saf.ha-e-dil par misra-e-tar kī shakl meñ aañsū girte haiñ
dard ke bādal chhāte haiñ to hotī hai barsāt ġhazal kī

ham guzar jaate haiñ har duur se aise jaise
ek aañsū kisī chehre se Dhalaktā guzrā

tū zindagī ke ruḳh pe tabassum kī ek rau
maiñ vaqt kī mizha pe ik aañsū rukā huā

shahr-e-ġhazal meñ dhuul uḌegī fan banjar ho jā.egā
jis din sūkhe dil ke aañsū sab patjhaḌ ho jā.egā

jis ke baġhair jī nahīñ sakte the jā chukā
par dil se dard aañkh se aañsū kahāñ gayā

ab ġham-e-dil kā safīna hai ki dariyā māñge
aur ye ronā hai ki aañsū bhī nahīñ āñkhoñ meñ

tamām umr ke aañsū use bujhā na sake
jo dil se tā-ba-jigar dam-zadan meñ aag lagī

ye vo aañsū haiñ jin se zohra ātishnāk ho jaave
agar piive koī un ko to jal kar ḳhaak ho jaave

koī aañsū sā ujālā koī mahtāb sī yaad
ye ḳhazīne haiñ inheñ sab se chhupā kar rakhkhūñ

apne āñchal meñ chhupā kar mire aañsū le jā
yaad rakhne ko mulāqāt ke jugnū le jā

ġham-o-alam ne to kar rakhā hai hamāre chehre ko zard 'joshish'
lahū ke aañsū agar na ro.eñ na hoñ mohabbat meñ surḳh-rū ham

tirī tahārat ko shaiḳh kah tū kahāñ se laa.eñ ik āb-e-jū ham
tavāf-e-dil kā hai qasd ham ko kareñ haiñ aañsū se nit vazū ham

un kī god meñ sar rakh kar jab aañsū aañsū royā thā
kuchh lamhe guzre vo lamha merī āñkhoñ se guzrā thā

jaane kis rañg meñ aa.ī hai bahārāñ ab ke
phuul bhī zaḳhm sā shabnam bhī hai aañsū kī tarah

ḳhud hue ġharq zamāne ko bhī ġharqāb kiyā
ek aañsū se vo tūfān uThā.e ham ne

aañsū bahā.ūñ āñkhoñ se us ko lagā ke maiñ
motī piro.ūñ yaar kī phūloñ ke haar meñ

merī palkoñ pe larazte hue aañsū motī
mere bujhte hue hoñToñ pe duā.eñ sūraj

maiñ is ḳhayāl se jaate hue use na milā
ki rok leñ na kahīñ sāmne khaḌe aañsū

maiñ ne jo kahā tuḳhm-e-vafā haiñ mire aañsū
kahne lage miTTī meñ unheñ daab na aa.e