Tags-Aansoo

kabhī aañsū kabhī ḳhvāboñ ke dhāre TuuT jaate haiñ
zarā sī aañkh meñ kyā kyā nazāre TuuT jaate haiñ

aañsū hamāre gir ga.e un kī nigāh se
in motiyoñ kī ab koī qīmat nahīñ rahī

us ne chhū kar mujhe patthar se phir insān kiyā
muddatoñ ba.ad mirī āñkhoñ meñ aañsū aa.e

aañsū paa.e hairat kyuuñ hai
vo kaaTā hai jo thā boyā

mirī be-zabān āñkhoñ se gire haiñ chand qatre
vo samajh sakeñ to aañsū na samajh sakeñ to paanī

aañsū puchh.enge kab tak ahbāb
Tapkā na rukegā chashm-e-tar kā

hijr meñ āñkheñ aañsū ban kar bah jaatī haiñ sochā na.iiñ
vo bhī us din ġhusse meñ thā aur maiñ ne bhī rokā na.iiñ

ye dāstān-e-dil hai kyā ho adā zabāñ se
aañsū Tapak rahe haiñ lafzeñ mileñ kahāñ se

aap kā dard in āñkhoñ se chhalaktā kaise
mere aañsū to piyāzoñ ke bahāne nikle

un kā vaada badal gayā hai
fardā aañsū meñ Dhal gayā hai

halkī sī siyāhī hai tahrīr-e-mohabbat kī
aañsū kī jagah bah kar phir ḳhūn-e-jigar aa.e

dekhā use to aañkh se aañsū nikal paḌe
dariyā agarche ḳhushk thā paanī tahoñ meñ thā

pātāl kī gahrā.ī se ubhrā mirā aañsū
chupke se phir ik kūza-e-be-āb meñ Duubā

ek aañsū kī tarah tum mujhe ruḳhsat karnā
rok lo palkoñ pe āġhāz-e-safar hone tak

mujh ko bhī ai sham.a ro le vasl kī shab hai aḳhīr
aur do aañsū bahā ai kushta-e-āzār-e-sub.h

is meñ aañsū bhī haiñ tabassum bhī
zindagī ik tazād-e-paiham hai

maiñ jo royā un kī āñkhoñ meñ bhī aañsū aa ga.e
husn kī fitrat meñ shāmil hai mohabbat kā mizāj

tum ne to aañsū hī dekhe haiñ tumheñ mālūm kyā
dard kā dariyā mirī āñkhoñ se ho kar bah gayā

be-mausam hī āñkhoñ meñ bhar jaate haiñ
aañsū bhī to chālākī kar jaate haiñ

us meñ kuchh TuuTe sapne the kuchh aaheñ kuchh aañsū the
jab jab bhī ham ne ye apnī jeb TaTolī bābū-jī