Tags-Aansoo

ġham-e-yār bhī abr-e-naisāñ hai ai 'bahr'
jo tapkeñge aañsū guhar rol leñge

jab koī aañsū mizha par aa ke chamkā shām-e-ġham
maiñ ye samjhā sub.h kā taarā numāyāñ ho gayā

tere mere biich nahīñ hai ḳhuun kā rishta phir bhī kyuuñ
terī aañkh ke saare aañsū merī aañkh se bahte haiñ

aañkh kam-baḳht se us bazm meñ aañsū na rukā
ek qatre ne Duboyā mujhe dariyā ho kar

gauhar-e-gosh kisū kā nahīñ jī se jaatā
aañsū motī se mire muñh pe Dhale jaate haiñ

hāl-e-pareshāñ sun kar merā aañkh meñ us kī aañsū haiñ
maiñ ne us se jhuuT kahā ho aisā bhī ho saktā hai

dil meñ agar nahīñ hai kisī zaḳhm kī numūd
surḳhī kahāñ se aa ga.ī aañsū meñ sochiye

apne dāman se to maiñ poñchh rahā huuñ aañsū
dāman-e-dost kī tauhīn magar hotī hai

ab to jī meñ hai ki har dukh par lagā.ūñ qahqaha
ho ga.ī haiñ shahr meñ āñsū-bharī āñkheñ to aam

ye aañsū be-sabab jaarī nahīñ hai
mujhe rone kī bīmārī nahīñ hai

yād-e-dandāñ meñ jo bahā aañsū
us ko ham durr-e-be-bahā samjhe

aañsū aañsū jis ne dariyā paar kiye
qatra qatra aab meñ uljhā baiThā hai

shikāyat us kī kyā tujh se ye apnī apnī qismat hai
ki merī aañkh ko aañsū mile tū ne hañsī paa.ī

mere aañsū na pī sakā ab tak
yuuñ to dariyā sikhā.egā sūraj

gaatā huuñ mere sur meñ sur mil jaa.e us kī lahroñ kā
merī aañkh meñ aañsū dekhe to phir apnī aañkh bhare dariyā

aañsū jaise bāda-e-rañgīñ dhaḌkan jaise raqs-e-parī
haa.e ye tere ġham kī halāvat rahtā huuñ ḳhush-kām bahut

sahar honī se pahle hī gulābī ho ga.e aañsū
shafaq phūlī hamārī dāstān-e-ḳhūñ-chakāñ ho kar

muskurātī hai mirī āñkhoñ meñ aañsū dekh kar
kis qadar be-dard hai zālim tirī tasvīr bhī

haa.e parvāne kā vo jalnā vo ronā sham.a kā
maiñ ne rokā varna kyā aañsū nikal aane meñ thā