Tags-Aansoo

jo aañsū dard kī gahrā.iyoñ meñ Duub jaate haiñ
vahī āñkhoñ ko bhī girdāb meñ tabdīl karte haiñ

is vāste ḳhāk-e-parvāna par sham.a bahātī hai aañsū
mumkin hai vafā ke qisse meñ us kā bhī kahīñ naam aa jaa.e

Daak ticket kī bhī koī auqāt hai kyā
terī yaad meñ aañsū jaarī hotā hai

merī hālat pe aañkh meñ aañsū
dard dar aayā kuchh chaTān meñ kyā

ek muTThī meñ phir zamīñ simTī
ek aañsū meñ āsmān paḌā

kitne bhī ġham-zada hoñ magar muskurā.eñge
va.ada jo kar liyā hai ki aañsū na ā.eñge

ḳhvāb āñkhoñ ko hamārī jo dikhā.e aa.ina
ḳhuun ke aañsū vahī ham ko rulā.e aa.ina

aañsū nikal rahe haiñ tasavvur meñ ban ke phuul
shādāb ho rahā hai gulistān-e-ārzū!

aur kyā rah gayā hai hone ko
ek aañsū nahīñ hai rone ko

hamāre ba.ad bahā.e kisī ne kab aañsū
ham ahl-e-dard ko abr-e-ravāñ ne yaad kiyā

bhūkā bachcha dekhā to in āñkhoñ se
aañsū kī phir ek nadī sī niklī hai

ye aañsū DhūñDtā hai terā dāman
musāfir apnī manzil jāntā hai

ye aañsū be-sabab jaarī nahīñ hai
mujhe rone kī bīmārī nahīñ hai

ab to ham yuuñ rahte haiñ is hijr-bhare vīrāne meñ
jaise aañkh meñ aañsū gum ho jaise harf kitāb meñ chup

ye aañsū rok rakhe haiñ ba-mushkil din guzāre haiñ
tumheñ dikhte nahīñ haiñ jo sabhī vo ġham tumhāre haiñ

na āñkheñ hī jhapaktā hai na koī baat kartā hai
bas ik aañsū ke daane par basar-auqāt kartā hai

rishta-e-sāf nigah meñ ho musalsal aañsū
sīna-e-yār meñ maalā na huā thā so huā

aañsū bahte haiñ aur dil ye soch ke Dartā hai
aañkh kahīñ koī baat na kah de us se ravānī meñ

Tapak paḌte haiñ vaqt-e-sub.h aañsū
ye aadat misl-e-shabnam ho ga.ī hai

zulfeñ idhar khulīñ adhar aañsū umañD paḌe
haiñ sab ke apne apne ravābit ghaTā ke saath