Tags-Aansoo

merī soch laraz uTThī hai dekh ke pyaar kā ye aalam
terī āñkhoñ se Tapkā hai aañsū ban kar merā ġham

hai dil meñ zabt aur āñkhoñ meñ aañsū
tasādum ko baḌhī aatī haiñ raileñ

zindagī tū ne hameñ dard ke aañsū baḳhshe
phir bhī tere hī taraf-dār hue haiñ ham log

laakh chāhā magar afsos ki aañsū na thame
zabt-e-ġham mujh se ba-qadr-e-ġham pinhāñ na huā

har kisī ko na dikhā apne ġhamoñ ke zevar
kāñch kī aañkh meñ aañsū nahīñ aane vaalā

ishq ke daur meñ kuchh aise bhī pahlū aa.e
hañsnā chāhā to mirī āñkhoñ meñ aañsū aa.e

peshānī-e-hayāt pe kuchh aise bal paḌe
hañsne ko dil ne chāhā to aañsū nikal paḌe

mujh ko duniyā kī tijārat meñ yahī haath aayā
maiñ ne aañsū hī kamā.e tujhe aañsū dūñgā

ye vo motī haiñ jin kī sīpiyāñ āñkheñ haiñ āshiq kī
mire aañsū ko marvārīd ke daane se kyā nisbat

dil meñ kasak aur lab par aaheñ aañkh meñ aañsū sar meñ saudā
husn kī duniyā ḳhandāñ ḳhandāñ ishq hai giryāñ apne vatan meñ

ḳhvāb aañsū ehtajājī zindagī
pūchhiye mat shahr-e-kalkatta hai kyā

bahtā aañsū ek jhalak meñ kitne ruup dikhā.egā
aañkh se ho kar gaal bhigo kar miTTī meñ mil jā.egā

maiñ jo royā un kī āñkhoñ meñ bhī aañsū aa ga.e
husn kī fitrat meñ shāmil hai mohabbat kā mizāj

sar-e-mizhgāñ mire aañsū kā sitāra chamkā
daar par ab asar-e-jazba-e-mansūr nahīñ

hañste hañste nikal paḌe aañsū
rote rote kabhī hañsī aa.ī

ḳhushk ho jā.egī rote hue sahrā kī tarah
kuchh bachā kar bhī to is aañkh meñ aañsū rakkho

kuchh dinoñ se jo tabī.at mirī yaksū kam hai
dil hai bhar-pūr magar aañkh meñ aañsū kam hai

bas vahī the matā-e-dīda-o-dil
jitne aañsū mizha talak aa.e

bhalā kyā fā.eda ab qabr pe aañsū bahāne se
agar māñ-bāp kī pahle duā lete to achchhā thā

vo shab ko bazm meñ hañs hañs ke pūchhte the hameñ
ye kaun haiñ ki jo aañsū bahā.e baiThe haiñ