Tags-Aansoo

dard thā haijān thā par aañkh meñ aañsū na the
jaise dil tak aate aate hādisa kam paḌ gayā

ġhazloñ kā hunar apnī āñkhoñ ko sikhā.eñge
ro.eñge bahut lekin aañsū nahīñ ā.eñge

āñkhoñ meñ jaise kāñch ke TukḌe chubho liye
palkoñ pe terī kaash maiñ aañsū na dekhtā

mere aañsū kabhī nahīñ rukte
maiñ hamesha vazū meñ hotā huuñ

koī rahe na rahe ek aah ik aañsū
ba-sad ḳhulūs ba-sad imtiyāz saath rahe

tere aañsū the ki be-dāġh sitāroñ ke charāġh
umr-bhar ke liye ham apnī sazā bhuul ga.e

terī āñkhoñ meñ aañsū bhī dekhe haiñ
tere hāthoñ meñ dekhā hai ḳhanjar bhī

apne aañsū 'amīr' kyuuñ poñchhūñ
in charāġhoñ meñ raushnī hai abhī

mirī mizhgāñ se aañsū pochhtā hai kis liye nāseh
Tapak paḌtā hai ḳhud jo is shajar meñ daana aatā hai

dariyā to ek pal meñ samundar se jā milā
aañsū ThiThak ke aañkh meñ ik dāstāñ hue

sitāroñ se shab-e-ġham kā to dāman jagmagā uThā
magar aañsū bahā kar hijr ke māroñ ne kyā paayā

koī dhaḌkan hai na aañsū na ḳhayāl
vaqt ke saath ye tūfān ga.e

dukhī samāj meñ aañsū bhare zamāne meñ
use ye kaun batā.e ki ashk-bār na ho

merā aañsū mujhe vāpas de do
ab maiñ aañsū na bahā.ūñgā kabhī

lagtā hai ki phailegī shab-e-ġham kī siyāhī
aañsū mirī palkoñ pe sar-e-shām na aa.e

rote dekhā thā maañ ko bachpan meñ
ab vo aañsū rulā rahe haiñ mujhe

mire aage to ab kuchh din se har aañsū mohabbat kā
kanār-e-āb-e-ruknābād o gulgasht-e-musallā hai

ġhurbat meñ tumhārī turbat par rone ko 'hafīz' aatā koī
ab shukr karo aañsū to puchhe chhiḌkāv bhī abr-e-karam ne kiyā

hañste hañste bahe haiñ aañsū bhī
rote rote hañstī bhī aa.ī hameñ

aañsū na pī sakeñge ye tanhā.iyoñ kā zahr
baḳhshā hai ġham mujhe to koī ġham-shanās de