Tags-Falak

kahā falak ne ye uḌte hue parindoñ se
zamīñ pe log makānoñ meñ qaid rahte haiñ

aag paanī havā zamīn falak
aur kyā chāhiye batā rab se

lagne na de bas ho to us ke gauhar-e-gosh ko baale tak
us ko falak chashm-mah-o-ḳhur kī putlī kā taarā jaane hai

falak pe jitne haiñ taare shumār se bāhar
nikal na jaa.eñ kisī din madār se bāhar

hamrāh chal rahā thā falak bhī tamām shab
yuuñ ahal-e-ḳhāk-o-ḳhvāb mah-o-najm se mile

dil kā gila falak kī shikāyat yahāñ nahīñ
vo mehrbāñ nahīñ to koī mehrbāñ nahīñ

us ko piite hī kiyā kartā huuñ meñ sair-e-falak
āsmānī use sab log bajā kahte haiñ

jigar kā dam hai ki gard-e-zamīñ se TūTtā hai
agarche toḌ na paayā falak bhī dam kā jigar

batā rahe haiñ falak ko dushman vo muntaqim hai kare jo chāhe
uThe hue haiñ jo haath apne tasavvur us ko duā na karnā

jin ke dam se dhartī raushan rashk-e-falak dikhlā.ī de
aise insāñ aise māh-o-aḳhtar zinda rahte haiñ

ga.ī na mar kar bhī kīna-ḳhvāhī milā ke miTTī meñ kī tabāhī
mirī tarah se kahīñ ilāhī falak bhī paivand ho zamīñ kā

zamīñ suuñ tā-falak saare hijābāt
hue haiñ matla-ul-anvār hamnā

falak miTā.egā mujh ko jo tum mukaddar ho
adāvat us kī baḌhegī tumhāre kiine se

lene ko aḳhtrān-e-falak se ḳhirāj-o-bāj
har aan sho.ala-o-sharar-afshān-e-nāla thā

gaaḌe falak pe kyā ye dil-e-nā-tavāñ alam
vo din ga.e jo auj-e-farāvān-e-nāla thā

kartā thā jin dinoñ ye falak ham se sar-kashī
nāvak-zanī kā aah se paimān-e-nāla thā

falak se maiñ chalā shabnam kī sūrat
zamīñ ne rakh diyā patthar banā ke

ġham nahīñ go ai falak rutba hai mujh ko ḳhaar kā
āftāb ik zard pattā hai mire gulzār kā

farsh to farsh falak par bhī sunā.ī degā
merī āvāz meñ āvāz milā.e rakhnā

falak pe kaalī badliyāñ qarīb-e-rūh-e-dilkashī
piyāle se piyāle ko milā milā ke pī gayā