Tags-Falak

zer-e-pā ab na zamīñ hai na falak hai sar par
sail-e-taḳhlīq bhī girdāb kā manzar niklā

jahān chhānā paḌā hai kab kā falak pe vahshat kā ab hai shohrā
kahāñ kā maġhrib kahāñ kā mashriq junūb kaisā shumāl kaisā

kyā kāñptā hai nāla-e-sozāñ se ai falak
jab baat thī ki mujh ko kiyā ho jalā ke ḳhaak

zamīñ pe har samt hadd-e-āḳhir
falak pe lā-intihā kī dahshat

falak vaale to hoñge hī muḳhālif
zamīñ vāloñ se yaarī kar rahā huuñ

zamīñ do-gaz nahīñ hai paas aur maiñ
falak par da.ave-dārī kar rahā huuñ

utregā chāñd to mirī bhar aa.egī ye aañkh
taare falak se TuuT kar rātoñ pe bojh haiñ

ġham-e-duniyā se gar paa.ī bhī fursat sar uThāne kī
falak kā dekhnā taqrīb tere yaad aane kī

jahāñ pe kal thā gulistāñ vo aaj maqtal hai
falak ḳhamosh hai phir dekheñ kis kī baarī hai

falak un se jo baḌh kar bad-chalan hotā to kyā hotā
javāñ se pesh-rau pīr-e-kuhan hotā to kyā hotā

ai kaash hamārī qismat meñ aisī bhī koī shaam aa jaa.e
ik chāñd falak par niklā ho ik chāñd sar-e-bām aa jaa.e

sitāre jaise falak se utar ke aa.e the
hathelī jal ke bujhī thī tumhārī baat nahīñ

tā-hadd-e-falak khiñchī hai dīvār
dīvār meñ koī dar nahīñ hai

zamīñ kā rizq huuñ lekin nazar falak par hai
kaho falak se mire rāste se haT jaa.e

dil hai yuuñ zaḳhm-dār-e-Dās-falak
jaise hotā hai machhlī kā khañDā

falak ko chāñd-sitāre navāzne vaale
mujhe charāġh jalāne ko sā.ebāñ bhī de

ai maah ye sab chashm-e-falak ke haiñ ishāre
aise to na thī mā.il-e-be-dād-garī aañkh

kab lag ahbāb kā ġham mujh ko dikhāvegā falak
ḳhaak ho ga.e bahut aur haiñ so chalan-hār ka.ī

us ne chaḌh kar mire kāñdhoñ pe falak chuum liyā
maiñ zamīñ par hī khaḌā rah gayā zīnoñ kī tarah

fazā mahdūd kab hai ai dil-e-vahshī falak kaisā
nilāhaT hai nazar kī dekhte haiñ jo nigāhoñ se