Tags-Falak

bas kahīñ thak bhī āsiyā-e-falak
ho chuke surma ham to ab pis ke

falak ġhā.eb huā ye chāñd taare ḳhāk-dāñ se haiñ
inheñ bhī log ik duniyā nayā aalam samajhte haiñ

roz palaT aatā hai lahū meñ Duubā tiir
roz falak par ek nishāna lagtā hai

falak ko kis ne ik parkār par rakkhā huā hai
zamīñ ko bhī usī raftār par rakkhā huā hai

ai tifl-e-ashk hai falak-e-haftamīñ pa arsh
aage qadam na rakhiyo tū zinhār dekhnā

ajiib manzar hai bārishoñ kā makān paanī meñ bah rahā hai
falak zamīñ kī hudūd meñ hai nishān paanī meñ bah rahā hai

ai daur-e-falak mujh ko qasam sar kī hai apne
ham shaad kabhī ye dil-e-nāshād kareñge

parvāz-e-fikr-e-nau nahīñ pahuñchī jahāñ talak
aisā falak meñ koī sitārā nahīñ rahā

bilā-javāz nahīñ hai falak se jañg mirī
aTak ga.ī hai sitāre meñ ik patañg mirī

purāne haiñ ye sitāre falak bhī farsūda
jahāñ vo chāhiye mujh ko ki ho abhī nau-ḳhez

kiyā thā gar falak tū ne siyah-baḳht
to maiñ us maah kā saayā to hotā

vo nīm-shab vo ruḳh-e-māhtāb-o-abr-e-siyah
shikastagī thī ki chashm-e-falak-numā niklī

esī kahānī bikaT hai ishq kāfir kī jo dekhe
to roveñ nuh falak aur chashm ho jaañ un kī nau nahrā

falak nujūm se raushan zamīñ charāġhoñ se
hujūm-e-nūr meñ ik shām-e-tār hai tanhā

na.ī fazā meñ na.e par nikālne hoñge
falak ko zer-e-zamīñ ko gurez-pā rakhnā

adū to kyā ye falak bhī use satā na sakā
ḳhushī hañsā na sakī ġham jise rulā na sakā

koī shaam aa rahī hai:
koī ḳhushnumā sitāra jo falak pe hañs rahā hai kisī mah-jabīñ kī sūrat

zamīñ se tā-ba-falak har taraf ta.affun hai
guloñ kī bū kā pata kyā chale havāoñ meñ

ye daulat rutba shohrat aur ye īmān miTTī hai
lagāyā haath tab jaanā falak be-jān miTTī hai