Tags-Falak

Dāliyoñ pe phudakne se jo mil ga.ī
us ḳhushī ke liye kyuuñ falak par uḌeñ

na jaane kis ke sahāre rukā huā hai falak
hameñ to farsh-e-zamīñ par koī sutūñ na milā

falak-shigāf thā is darja iztirāb-e-amal
ki bandagī meñ farishtoñ ko bhī sukūñ na milā

ajal aa.ī na shab-e-hijr meñ aur ham ko falak
be-ajal tū ne tamannā-e-ajal meñ maarā

hai ḳhaak par nashist falak par uḌaan hai
merī zamīñ bhī taḳht-e-sulaimāñ se kam nahīñ

chain duniyā meñ zamīñ se tā-falak dam bhar nahīñ
daaġh haiñ ye gul nahīñ nāsūr haiñ aḳhtar nahīñ

chāhtī huuñ falak ko chhū lenā
jāntī huuñ magar maqām apnā

ham zamīñ-zād falak-zād nahīñ haiñ phir bhī
fan kī me.arāj pe hai lafz kī hurmat ham se

falak kī ḳhabar kab hai nā-shā.iroñ ko
yūñhī ghar meñ baiThe havā bāñdhte haiñ

bām-e-falak pe gar vo uḌātā nahīñ patañg
ḳhurshīd o maah Dor ke phir kis kī gole haiñ

zamāna kyā dekhiye dikhā.e na jaane kyā inqalāb aa.e
falak ke tevar meñ ḳhashmagīñ se zamīñ ke dil meñ ġhubār sā hai

ik tarah kī musībat hotī to jhel lete
har shab na.ī zamīñ thī har din falak nayā thā

mat sahl hameñ jaano phirtā hai falak barsoñ
tab ḳhaak ke parde se insān nikalte haiñ

siina pe siina ḳhisht pe goyā ki ḳhisht hai
ab ai falak nazāra-e-ta.amīr-e-vasl kar

gūñjtī hī rahegī falak-dar-falak
hai mashiyyat kī aisī sadā aadmī

har moḌ pe haiñ sar-ba-falak qasr-numāyāñ
har moḌ pe kashkol liye log khaḌe haiñ

falak chakkar meñ kyuuñ chauñsaTh ghaḌī hai
girah us ke bhī tāle.a meñ kaḌī hai

ye kis kāfir kī ḳhātir 'mehr' chakkar meñ tū rahtā hai
ye kis ke vāste gardish falak ke charḳh puujā hai

kisī kī yaad meñ akasr yahī huā mahsūs
falak zamīn pe utrā mah-e-tamām liye

koī dab gayā koī mar gayā koī pis gayā koī miT gayā
tire ishve se jab se falak bane tire ġhamze jab se qazā hue