Tags-Falak

aisī aag falak se barsegī ik din
ḳhaak havā paanī patthar jal jā.eñge

mujhe hai ḳhauf-e-zamāna na nīche dab jaa.e
maiñ apne sar kā falak ko umuud sauñptā huuñ

vo bāda-nosh haqīqat hai is jahāñ meñ 'ravāñ'
ki jhuum jaa.e falak gar use ḳhumār aa.e

nasheman ho na ho ye to falak kā mashġhala Thahrā
ki do tinke jahāñ par dekhnā bijlī girā denā

ham ne sau baar shab-e-vasl milā kar dekhā
ai falak chāñd se vo chāñd se sūrat achchhī

sunā.egā kahāñ tak qissa-e-ġham 'rāz' rahne de
ye ġham Dar hai kahīñ dosh-e-falak par baar ho jaa.e

judā huī thī vo jab dil pe vaar karne ko
falak pe qaus-e-quzah bhī kamān ho rahī thī

sadme kī shiddatoñ se har ik aañkh ḳhushk thī
ye dekh kar falak pe ghaTā chīḳhtī rahī

hai dil ko jo yaad aa.ī falak-e-pīr kisī kī
āñkhoñ ke tale phirtī hai tasvīr kisī kī

aa gayā hai ai falak zarroñ ko ehsās-e-ḳhudī
maiñ samajhtā huuñ ki vaqt-e-intiqām aa hī gayā

zamīñ se tā-ba-falak koī fāsla bhī nahīñ
magar ufuq kī taraf koī dekhtā bhī nahīñ

ai jān-e-jāñ tire mizāj kā falak bhī ḳhuub hai
thake thake se baam par hasīñ dhanak bhī ḳhuub hai

ye daur hai chashm-e-surma-gūñ kā falak hai ik qatra bahr-e-ḳhūñ kā
jahān meñ rañg hai fusūñ kā hai mast har shaiḳh-o-shabāb kaisā

ziyāda ai falak de rañj-o-rāhat ham ko jo kuchh de
na do din kā ye ġham achchhā na do din kī ḳhushī achchhī

chāñd ho aur na zamīñ ho na sitāre na falak
mujh ko is shahr meñ yārab kabhī rahnā na paḌe

ishq ne kar diyā kyā kyā suḳhan-ārā tire naam
vo jo gaatā thā falak par vo sitārā tire naam

ye naam jis kā qamar rakhā hai mujhī se ik daaġh le gayā hai
samajh to dekho samajh rahā hai falak usī ko javāb-e-āriz

na itnā shor kar zālim hamāre TuuT jaane par
ki gardish meñ falak se bhī sitārā TuuT jaatā hai

falak ke daur se duniyā badal ga.ī varna
jahāñ bane haiñ ye mai-ḳhāne ḳhān-qāheñ thiiñ

ye zo.af hai ki nikaltī nahīñ haiñ ab dil se
kabhī falak se bhī ūñchī hamārī aa.heñ thiiñ