Tags-Falak

kisī kā zor zabardast par nahīñ chalnā
falak ne zulm kiyā kis ne intiqām liyā

pheñkā gayā na pīr-e-falak na.al kī tarah
koī na tifl-e-ashk hamārā javāñ huā

falak pe DhūñDte haiñ gard-e-rañg-e-rafta-e-dil
zamīñ pe shām-e-talab kā nishāñ banāte haiñ

vo falak sañgīt meñ miTTī kī dhun to kyā huā
sāregāmā se kahīñ hotā hai pādhānī alag

ab ke baras to dil kī zamīñ par aag falak se barsī hai
fikr kī gandum ke dānoñ se ḳhālī haiñ khaliyān mire

zamīñ kuchh falak ko batāne lagī hai
dhanak rañg ke giit gaane lagī hai

parkār kī ravish phire ham jitne chal sake
is gardish-e-falak se na bāhar nikal sake

rahā falak pe sitāroñ meñ jalva gar mahtāb
vo apne sīna-fagāroñ ke paas aa na sakā

yuuñ tire mast sar-e-rāh chalā karte haiñ
jaise shāhān-e-falak-e-jāh chalā karte haiñ

falak ke haath se ai ḳhāliq-e-ḳhalq
kui nahīñ aa ke duniyā meñ rahā ḳhush

rashk-e-falak hai ye bastī
har chehra hai mahr o maah

falak ne bhī sīkhe haiñ tere hī taur
ki apne kiye par pashemāñ nahīñ

zamīn ghūmtī hai roz apne mehvar par
falak khaḌā hai usī tarah sar uThā.e hue

jinhoñ ne māñgī unheñ to dī hī ga.ī jahāñ meñ ḳhushī kī daulat
baġhair māñge bhī kāhiloñ par falak se ġham be-hisāb utre

falak kī be-ruḳhī se tañg aa kar
zamīñ ne kar liyā kuchh faisla to

zamīn par hai samundar falak pe abr-e-ġhubār
utārtī hai kahāñ dekhiye havā mujh ko

falak ko toḌ duuñ maiñ apnī aah se lekin
zamīn vāloñ se be-intihā hai pyaar mujhe

falak kī sulh ko samjhe raho 'vaqār' jidāl
bane bhī dost jo dushman to e'tibār kahāñ

pa.e daryāft asrār-e-haqīqat sab haiñ sargardāñ
falak ke paar lekin aql-e-insānī nahīñ jaatī

bane 'qadr' aise ġhubār ham hue gardishoñ meñ vo ḳhaar ham
ki misāl-e-dā.era-e-falak jo uThe to be-sar-o-pā hue