Tags-Falak

bandisheñ toḌ ke aisā to nikal aayā thā
chāñd jaise ki falak se ye phisal aayā thā

vo zamīñ pe jin kā thā dabdaba ki buland arsh pe naam thā
unheñ yuuñ falak ne miTā diyā ki mazār tak kā nishāñ nahīñ

tule haiñ phir mah-o-anjum mujhe satāne par
dil-e-hazīñ vahī ik nāla-e-falak-paimūd

falak gā rahā hai zamīñ gā rahī hai
kaleje meñ har lai chubhī jā rahī hai

nichoḌo koī baḌh ke dāman shafaq kā
falak par ye kis ne girā dī gulābī

falak karne ke qābil āsmāñ hai
ki ye pīrāna-sar jāhil javāñ hai

falak pe jab bhī haqā.eq kī surḳhiyāñ ubhrīñ
zamīñ se kohna rivāyāt kā ġhubār uThā

guzre so guzre ahl-e-zamīñ uupar ai falak
ā.inda yaañ talak to koī ḳhūb-rū na ho

kab se terā falak-e-sho.abada-bāz
dekhtā huuñ maiñ tamāshā baiThā

zamīñ se ta.alluq na rishta falak se
musībat hai goyā buland āshyiānī

aks-e-falak se TūTtā kaise jumūd aap
patthar girā ke jhiil ke andar bhī dekhte

talāsh usī kī musalsal usī ko pā kar bhī
zamīñ se tā-ba-falak hai ye mashġhala dil kā

shuā-e-mahr kī nazzārgī ke shauq meñ chāñd
falak ke dīda-e-be-ḳhvāb meñ Dhalā hogā

arsh-o-kursī-o-falak dair-o-haram ka.aba-e-dil
phir bhī mahdūd tirī jalvagarī hotī hai

is jhaḌī setī kahīñ gir na paḌe bām-e-falak
is tarah rote haiñ tujh bin dar-o-dīvār ki bas

shi.ār kī jo mudārāt-e-qāmat-e-jānāñ
kiyā hai 'faiz' dar-e-dil dar-e-falak se buland

din judā.ī kā diyā vasl kī shab ke badle
lene the ai falak-e-pīr ye kab ke badle

khaḌā huuñ zer-e-falak gumbad-e-sadā meñ 'munīr'
ki jaise haath uThā ho koī duā ke liye

kuchh aage baḌh chale sāmān-e-rāhat lā-makāñ ho kar
falak pīchhe rahā jaatā hai gard-e-kārvāñ ho kar

yahī kanār-e-falak kā siyah-tarīñ gosha
yahī hai matla-e-māh-e-tamām kahte haiñ