Tags-Falak

ḳhalā ke gumbad-e-be-dar meñ koī rauzan kar
ḳhudā-e-nūr falak par koī sitāra bhej

zer-e-falak jahāñ Tak āsūda 'mīr' hote
aisā nazar na aayā ik qata-e-zamīñ bhī

falak kī tarah jafā.eñ na kījiye har roz
isī qadar hai ye ne.amat jo gaah gaah mile

hayāt o maut kahānī hai sā.ebānoñ kī
kabhī falak ke tale ham kabhī zamīñ ke tale

isī ḳhayāl se kartā nahīñ par-afshānī
mire paroñ kī ragaḌ se kahīñ falak na jale

vo jafā-gar falak sitamgar hai
kise achchhā kise burā kahiye

falak dushman huā gardish-zadoñ ko jab milī rāhat
ziyāda raah se khaTke mujhe manzil meñ rahte haiñ

ḳhuda-e-har-do-jahāñ ḳhuub hai tirī taqsīm
zamīñ pe dair-o-haram aur falak pe maiḳhāne

zarroñ ko yahāñ chain na ajrām-e-falak ko
ye qāfila be-tāb kahāñ garm-e-safar hai

baaġh meñ gulchīñ hai na hai maalī bijlī hai na falak pe sahāb
ahd-e-ḳhizāñ meñ jalā hai nasheman aa ke kahāñ se phuul paḌā

mujh se kyā chhīn sakā tū ki abhī tak mere
paañv ke nīche zamīñ sar pe falak baaqī hai

bahut udaas akelā hamesha lauTā kyuuñ
falak pe jo bhī dikhā mujh ko jagmagātā huā

falak ke chāñd sitāroñ meñ raushnī kam hai
mujhe to lagtī hai is meñ ḳhatā udāsī kī

ai falak tujh ko qasam hai mirī is ko na bujhā
ki ġharīboñ ko charāġh-e-shab-e-tārīk hai dil

ham falak ke aadmī the sākinān-e-qarya-e-mahtāb the
ham tire hāthoñ meñ kaise aa ga.e ham to baḌe nāyāb the

vo khīñchūñgā 'jalāl' aaheñ ki us kī ḳhaak uḌā deñgī
falak ne piis Daalā hai samajh kar ḳhāksāroñ meñ

sifat-e-kīna mirā ghar hai falak ke dil meñ
girah-e-dushman-e-ḳhātir meñ bañdhā rahtā huuñ

falak detā hai jin ko aish un ko ġham bhī hote haiñ
jahāñ bajte haiñ naqqāre vahāñ mātam bhī hotā hai

falak bhī jo chāhe to achchhe na hoñge
hamārā adū hai masīhā hamārā

vo aaj aa.e haiñ 'nādir' to aisā lagtā hai
falak pe jaise hamārā ġharīb-ḳhāna huā