Tags-Falak

chashm-e-falak kā ik aañsū hai gardish kartī zamīñ
kyā pesh aayā jo us ne binā-e-dīda-e-tar Daalī

bebasī meñ Duubī nazroñ se falak
ab qafas se bas nihārā jā.egā

vo pīr-e-mai-ḳhāna-e-falak in dinoñ bahut mehrbāñ hai mujh par
to ḳhud surāhī banā huā hai mujhe piyāla banā diyā hai

mere dāman meñ aa gire saare
jitne tasht-e-falak meñ taare the

falak kā naam na le koī sāmne un ke
vo us ke zikr ko apnā gilā samajhte haiñ

sab vahm thā duniyā thī falak thā na zamīñ aur
jab ā.īna dekhā to nazar aa.e hamīñ aur hamīñ aur

chalte chalte na ḳhalish kar falak-e-dūñ se 'nazīr'
fā.eda kyā hai kamīne se jhagaḌ kar chalnā

falak se pheñk ke dekhā ki TūTne kā nahīñ
girā ke apnī nigāhoñ se chuur chuur kiyā

terā rishta hai falak se to zamīñ ko na ujaaḌ
narm miTTī kī mahak man meñ samone de mujhe

ye tujh pe falak ne zulm kiyā vo mujh se judā maiñ un se judā
ḳhushiyāñ to manāo ahl-e-jahāñ barbād mohabbat hotī hai

falak pe kuchh der chāñd Thahrā
vidā.a lete hue sahar se

be-falak zamīnoñ par raushnī ko tarsoge
soch ke darīchoñ meñ koī kahkashāñ rakhnā

falak ne us ko paalā thā baḌe nāz-o-ni.am se
sitāra jo tire ruḳhsār par rakkhā huā thā

anjum-e-tābāñ falak par jāntī hai jis ko ḳhalq
kuchh sharāre haiñ vo merī āh-e-ātish-bār ke

jo arsh-e-jāh sitāra-shikār the un ko
falak kī aañkh ne dekhā faganda-sar ḳhāmosh

sifat-e-ābla mīnā-e-falak TuuT gayā
kyā qayāmat tirī raftār kā andāz huā

arsa-e-dahr meñ bāñdhā jo tilism-e-ulfat
dushman-e-jāñ falak-e-shobada-pardāz huā

baḳhshe jo falak ġham-e-zamāna
ġham-ḳhvār vo huuñ ki nāshtā ho

badalte rañg zaḳhmoñ ke haiñ niile surḳh aur kaale
falak ko bhī ye gardish chār-sū karne se miltā hai