Tags-Falak

ye kaise shaḳhs ke hāthoñ meñ de diyā ḳhud ko
falak kī samt mujhe baar baar pheñktā hai

falak kī samt nigāheñ uThāne se pahle
zamīñ ke saare manāzir ko paara paara kiyā

ḳhudā jaane duā thī yā shikāyat lab pe bismil ke
nazar sū-e-falak thī haath meñ dāmān-e-qātil thā

jaane kis lamha-e-vahshī kī talab hai ki falak
dekhnā chāhe mire shahr ko jañgal kar ke

sūraj ke tamāñche se falak jaag gayā hai
bistar se magar phir bhī sitāre nahīñ uThte

dil-e-sozāñ kī 'jahāñdār' tire tā-ba-falak
kaun sī aah thī jo misl-e-havā.ī na ga.ī

yaañ jo dil-e-raushan ki vo ḳhālī hai ḳhudī se
pahuñchā.ī falak ne use mahtāb kī mīrās

sunte haiñ falak-bos imārat hai tah-e-āb
kyā shahr thā kyā mauj kī raftār mirī jaañ

falak tere jigar ke daaġh haiñ ham
miTā.e jā miTānā hai jahāñ tak

āshiqoñ ko ai falak devegā tū āzār kyā
dushman-e-jāñ un kā thoḌā hai dil-e-bīmār kyā

baqā-e-nūr falak par bhī ho ga.ī mushkil
umaD rahī thiiñ ghaTā.eñ qamar akelā thā

jo thiiñ chashm-e-falak kī bhī nūr-e-nazar vahī jin pe nisār the shams o qamar
so ab aisī miTī haiñ vo anjuman.en ki nishān bhī un ke kahīñ na rahe

vo havā na rahī vo chaman na rahā vo galī na rahī vo hasīñ na rahe
vo falak na rahā vo samāñ na rahā vo makāñ na rahe vo makīñ na rahe

dikhā rahī hai tamāshā falak kī nairañgī
nayā hai sho.abada har baar dekhte jaao

falak kī sair ke paiġhām aate rahte haiñ
badan hī ḳhaak kī dahshat se kam nikaltā hai

shaġhl hai naala kuchh murād nahīñ
kyā karūñ ai falak asar le kar

merī nākāmī se falak ko husūl
kaam hai ye usī sitamgar kā

aksar zamīñ se uḌ ke falak par gayā huuñ maiñ
mushkil thā ye kamāl magar kar gayā huuñ maiñ

sar ko na pheñk apne falak par ġhurūr se
tū ḳhaak se banā hai tirā ghar zamīn hai