Tags-Falak

allāh allāh tire husn kī ik jhalak raushnī ho ga.ī az-zamīñ-tā-falak
ek bijlī sī lahrā.ī kuchh duur tak phir Thahar kar mire rū-ba-rū rah ga.ī

ġhul thā zahe husain kī shaukat zahe vaqār
goyā khaḌe haiñ jañg ko mahbūb-e-kirdgār

sham-e-harīm-e-lam-yazalī thā gulū-e-shāh
tārīk shab meñ jaise huvaidā ho nūr-e-māh

ruḳhsār haiñ ziyā meñ qamar se ziyāda-tar
jin par Thahar sakī na kabhī shams kī nazar

kaif o mastī 'shujā.a' falak tak hai
dard yuuñ qalb meñ machalte haiñ

tīrgī baḌhtī hai tūfān umaD aatā hai
badliyāñ chhā ke barastī haiñ falak phir se nikhar jaatā hai

kuchh had bhī ai falak sitam-e-nā-ravā kī hai
har saañs dāstāñ tire jaur-o-jafā kī hai

tum apne ho to nahīñ ġham kisī muḳhālif kā
zamāna kyā hai falak kyā hai mudda.ī kyā hai

'firāq' vaqt ke ruḳh se ulaT rahī hai naqāb
zamīñ se tā-ba-falak hai is inqalāb kī aañch

na vo zamīñ na vo falak na ab vo kā.enāt hai
vo zindagī hī ab nahīñ na din hai vo na raat hai

dabe jo ghuT ghuT ke dil meñ armāñ vo barq ban kar falak pe taḌpe
jo valvala jī meñ rah gayā thā vo bulbula ab hai āb-e-jū kā

tāsīr aah kī kabhī tum ko dikhā.eñge
ham haiñ to gumbad-e-falak-e-chambarī nahīñ

mirī āh-e-sā.iqa-bār jab mire tūr-e-dil pe chamak ga.ī
jo zamīñ se tā-ba-falak ga.ī to falak se tā-ba-samak ga.ī

kyā un ko ḳhabar hai jo falak kahte haiñ mujh ko
maiñ apnī bulandī ke liye ḳhaak huā huuñ

mirī parvāz thī 'shāhid' falak par
zamīñ kī pastiyāñ maiñ dekhtā kyā

maiñ huuñ anā ke koh-e-falak-bos kā raqīb
mujh ko ravā nahīñ hai kisī ḳhār-o-ḳhas se jañg

hai abr to kyā chāhe falak ko bhī jalā de
bijlī meñ kahāñ shola-fishānī mire dil kī

tumhāre baam kī sham.eñ bhī tābnāk nahīñ
mire falak ke sitāre bhī zard zard se haiñ

ab uḌā.ūñgā use tere falak par ik din
apnī miTTī ko ikaTThā to kiyā hai maiñ ne

mil baiThne ye de hai falak ek dam kahāñ
kyā jaane tum kahāñ ho koī dam ko ham kahāñ