Tags-Gham

un kā marīz-e-ġham hai ka.ī din se jāñ-ba-lab
vo dil meñ sochte haiñ bahāna na ho kahīñ

haañ manzil-e-ummīd bhī nazdīk thī lekin
ġham-ḳhāna-e-jānānāñ bahalne nahīñ detā

agar vo pūchh leñ ham se tumheñ kis baat kā ġham hai
to phir kis baat kā ġham hai agar vo pūchh leñ ham se

mire saath chalne ke shauq meñ baḌī dhuup sar pe uThā.egā
tirā naak naqsha hai mom kā kahīñ ġham kī aag ghulā na de

tujh ko pā kar bhī na kam ho sakī be-tābī-e-dil
itnā āsān tire ishq kā ġham thā hī nahīñ

saarī duniyā ke ġham hamāre haiñ
aur sitam ye ki ham tumhāre haiñ

lashkar-e-ġham ne dil siiñ kuuch kiyā
jab se is meñ maqām hai terā

guzar rahī hai jo dil par vahī haqīqat hai
ġham-e-jahāñ kā fasāna ġham-e-hayāt se pūchh

maiñ kyā jānūñ kis manzil kī kin rāhoñ kī khoj meñ huuñ
merā Thor Thikānā ġham hai koī na aa.e saath mire

be-dar-o-bām Thikānā jis meñ dhuul dhuup sannāTā ġham
vahī hai mujh vahshī ke ghar meñ jo kuchh hai vīrānoñ meñ

rāh-e-talab meñ dūrī-e-manzil kā ġham nahīñ
ma.alūm ho chukā hai ma.āl-e-safar mujhe

barbādiyoñ kā apnī koī ġham nahīñ magar
pā.egī phir kahāñ ye tumhārī nazar mujhe

tirā ġham kākuleñ khole hue hai
mire siine meñ shāmeñ Dhal rahī haiñ

mar kar marīz-e-ġham kī vo hālat nahīñ rahī
yaanī vo iztirāb kī sūrat nahīñ rahī

dil aur havā-e-silsila-e-jambāni-e-nashāt
kyuuñ pās-e-vaz-e-ġham tujhe ġhairat nahīñ rahī

kis muñh se ġham ke zabt kā daavā kare koī
tāqat ba-qadr-e-hasrat-e-rāhat nahīñ rahī

nā-tavāñ dil uThā.e kyā ġham-e-ishq
ik taraf raa.ī ek samt pahāḌ

shola-e-ġham se dil kā haal ye hai
jaise pahlū meñ jal rahā ho bhaaḌ

haath rakh detā hai shāne pe tasavvur un kā
ġham kī rātoñ meñ koī jalva-figan hai ki jo thā

tū bhī ruḳhsat ho rahā hai dhuup bhī Dhalne ko hai
mere andar ik charāġh-e-shām-e-ġham jalne ko hai