Tags-Gham

ġham-kada-e-hayāt meñ aah maiñ vo charāġh huuñ
sub.h huī jalā diyā shaam huī bujhā diyā

isī baa.is to duniyā kī musībat ġham nahīñ hotī
ye duniyā ġham to detī hai sharīk-e-ġham nahīñ hotī

salīqa chāhiye āvāz ko pahchān lene kā
navā-e-shā.irī har dam navā-e-ġham nahīñ hotī

toḌ rahā hai aaj dam ġham meñ koī marīz-e-ġham
phir bhī haiñ aap be-ḳhabar aap ko kuchh ḳhabar nahīñ

ham un ke ġham meñ taḌap rahe haiñ jo ġhair se dil lagā chuke haiñ
hamāre dil meñ hai yaad un kī jo ham ko dil se bhulā chuke haiñ

balā-e-mahshar bhī sahal un ko azāb-e-dozaḳh bhī un ko āsāñ
jo terī ulfat meñ apne dil par ġham-e-judā.ī uThā chuke haiñ

āñkheñ niiñd se kyuuñ haiñ bojhal
ġham kā nasha kuchh TuuT rahā hai

sab ko hai apnā apnā ġham
kis ne kis kā ġham samjhā hai

tū chalā gayā hai to shahr phir vahī dasht-e-ġham hai mire liye
vahī maiñ huuñ aur mirī zindagī mire āñsuoñ meñ bharī huī

shor barpā hai dil ke 'sāgar' meñ
aaj mushkil hai ġham chhupā rakhnā

mire liye shahr-e-kaj meñ rakkhā hī kyā hai jo apne ġham gañvā.ūñ
vo ek dāmāñ bahut hai mujh ko sukūt-afzā farāġhatoñ meñ

kyā likhūñ kyā na likhūñ surḳhī-e-afsāna-e-dil
ġham bhī hai dard bhī hasrat bhī hai fariyād bhī hai

na jo dil ke āsmāñ par koī barq sī lapaktī
ġham-e-marg-e-ārzū hī mirā ġham-gusār hotā

maqtal meñ na masjid na ḳharābāt meñ koī
ham kis kī amānat haiñ ġham-e-kār-e-jahāñ deñ

ġham vo rāhat jise qismat ke dhanī paate haiñ
dam vo mushkil hai ki maut aa.e to āsāñ ho jaa.e

ġham-e-mehsūs vo bātil jise kahte haiñ majāz
dil kī hastī vo haqīqat hai jo uryāñ ho jaa.e

kabhī to ham pe khuleñge ḳhushī ke darvāze
isī umiid pe ham tere ġham uThā.e ga.e

ugal rahe the jo laavā ġham-e-ta.assub kā
hamāre ḳhuuñ se vo ātish-fishāñ bujhā.e ga.e

ishq meñ bhī maza hai jiine kā
ġham uThāne kā gar salīqa hai

mohtasib-e-sharāb to bazm-e-jahāñ meñ haiñ bahut
ye bhī kaho ki hai koī mohtasib-e-ġham-e-nihāñ